Pinchecarneiro impulsa o I Mercado das Perseidas este sábado en Ribadeo para amosar os traballos de novos creadores

Pinchecarneiro Asociación de novos creadores locais é unha entidade cultural de recente creación en Ribadeo que ten entre os seus obxectivos potenciar o traballo en rede promovendo accións que melloren a representación e visibilidade de novos creadores e deseñadores locais dentro da nosa comunidade.

Coa finalidade de presentar a Asociación a tódolos veciños, dar a coñecer o traballo dos seus integrantes e ofrecer a quen poida estar interesado a posibilidade de facerse socio, levarán a cabao a celebración do primeiro Mercado das Perseidas na tarde -entre as 18.00 e as 23.00 horas- do sábado 9 de agosto no parque de San Francisco no que participarán creadores e deseñadores da Asociación e outros invitados da comarca para mostrar os seus traballos: camisetas, sombreiros e tocados, actividades para nenos, tecidos, complementos, pintura, láminas e debuxos, moda…

Tódolos postos serán decorados de xeito atractivo para que o conxunto resulte interesante e transmita unha boa imaxe ao público. De feito destacan como público diana a tódolos veciños e veciñas de Ribadeo en xeral, e aos turistas, que desexen pasar un rato agradable vendo os traballos dos participantes. Ademais poderán disfrutar da música en directo do grupo local Remakers a partir das 20.30 horas.

Agardan que sexa a oportunidade para mostrar o traballo “ata agora oculto de novos creadores e de deseñadores locais que contan por fin cun foro de participación para transmitir unidos a todo a xente que en Ribadeo xunto coa tradición tamén xurden novas voces e enfoques que nos achegan á vanguardia da creación artística”.