Burela regula a alimentación das colonias felinas para mellorar a convivencia e o benestar animal

O formulario de solicitude do carné estará dispoñible no departamento de Información municipal e na web do Concello, para a súa presentación por rexistro ou sede electrónica

Burela, 2 de setembro de 2026. O Concello de Burela pon en marcha un novo carné de alimentador/a de colonias felinas, un sistema que busca recoñecer e ordenar o importante labor das persoas que coidan diariamente os gatos comunitarios e integralas na xestión e control das colonias.

Trátase dunha das primeiras medidas que se desenvolven tras a aprobación definitiva do novo Plan de Control e Xestión Ética de Colonias Felinas Urbanas a nivel municipal.
A iniciativa pretende, por unha banda, ordenar e coordinar a alimentación dos gatos comunitarios e, por outra, recoñecer o importante labor que realizan as persoas alimentadoras, moitas delas implicadas desde hai anos de maneira voluntaria no coidado dos animais.

A alcaldesa de Burela, Carmela López, destaca que “son precisamente estas persoas as que mellor coñecen o día a día de cada colonia”.

“Saben que animais a integran, detectan rapidamente a chegada dun gato novo, poden advertir dun animal enfermo ou ferido e colaboran para facilitar as capturas e o posterior seguimento das esterilizacións”, explica a rexedora.

“O novo sistema busca que todo ese coñecemento e compromiso formen parte dunha xestión coordinada entre Concello, persoas alimentadoras e Protectora Bigotes”, afirma López.

Como solicitar o carné

O formulario de solicitude do carné estará dispoñible no departamento de Información do Concello de Burela, onde poderá cubrirse para a súa posterior presentación a través do Rexistro Municipal.

Tamén poderá descargarse desde a páxina web do Concello e presentarse telematicamente a través da sede electrónica municipal. Os carnés serán persoais e numerados e permitirán identificar a colonia coa que colabora cada persoa.

Unha vez tramitada a solicitude, o Concello contactará coa persoa solicitante para que poida recoller o seu carné e o correspondente kit de alimentador/a.

“Unha peza fundamental”

A alcaldesa de Burela afirma que “as persoas alimentadoras das colonias son unha peza fundamental, o Seu labor é esencial para que o sistema funcione”. “A presenza diaria nas colonias convérteas nos ollos sobre o terreo e permite ter información que sería imposible obter doutra maneira”, apunta.

“Ademais de proporcionar alimento e auga, colaboran comunicando a aparición de novos individuos ou de animais enfermos ou feridos, facilitando as actuacións de captura e esterilización e observando o estado dos gatos posteriormente” engade.

A posta en marcha deste sistema non pretende unicamente regular a alimentación, senón tamén dar cobertura, recoñecer e incorporar á xestión municipal ás persoas que voluntariamente dedican o seu tempo ao coidado dos gatos comunitarios.

Ao solicitar o carné, as persoas autorizadas comprométense tamén a seguir unhas pautas comúns: proporcionar auga limpa e fresca, empregar preferentemente penso seco, manter limpa a zona, procurar horarios regulares e non deixar vísceras nin restos orgánicos.

Deste xeito, o Concello quere, en palabras da rexedora, “acompañar e facilitar o traballo das persoas que xa están implicadas, ao tempo que se establecen criterios comúns que permitan compatibilizar o benestar animal coa limpeza dos espazos públicos e a convivencia coa veciñanza”.

Un Plan para xestionar as colonias

A implantación dos carnés forma parte do Plan de Control e Xestión Ética de Colonias Felinas Urbanas do Concello de Burela, aprobado definitivamente mediante Decreto de Alcaldía do 27 de xullo e publicado no Boletín Oficial da Provincia o 3 de agosto.

O Plan busca contar cun marco organizado para identificar e realizar o seguimento das colonias, controlar a súa poboación, establecer condicións adecuadas de alimentación e hixiene e coordinar ás persoas implicadas no seu coidado.

Unha das ferramentas fundamentais neste obxectivo é o método CER, de Captura, Esterilización e Retorno. Os gatos comunitarios son capturados para proceder á súa esterilización e posteriormente retornan á súa colonia, onde continúan baixo control e seguimento.

A esterilización permite frear progresivamente a reprodución e evitar o crecemento descontrolado das colonias. “Por iso, xestionar unha colonia non significa simplemente alimentar os animais, significa coñecelos, controlalos, esterilizalos, detectar novas incorporacións, atender posibles problemas e facer un seguimento continuado”, indica López.

Traballo conxunto coa Protectora Bigotes

“Neste proceso resulta tamén fundamental a colaboración da Protectora Bigotes, que axuda ao Concello na atención aos animais e no traballo relacionado coas colonias felinas”, subliña a alcaldesa burelá.

“A súa experiencia, sumada ao coñecemento diario das persoas alimentadoras, permite construír unha rede de colaboración na que cada parte resulta necesaria”, salienta.
López agradeceu expresamente tanto á Protectora Bigotes como ás persoas alimentadoras e voluntarias o traballo que realizan durante todo o ano, “moitas veces de maneira silenciosa e dedicando o seu propio tempo ao coidado dos animais”.

“Co Plan definitivamente aprobado, a posta en marcha dos carnés e dos kits e a colaboración entre Concello, Protectora Bigotes e persoas alimentadoras, Burela avanza cara a unha xestión máis organizada, responsable e ética das colonias felinas, baseada no control poboacional, no benestar animal, na limpeza e na convivencia”, conclúe.