O Burela FS Pescados Rubén sumou este sábado a súa terceira vitoria consecutiva da tempada na complicadísima pista do Marfil Santa Coloma (4-5); tras un primeiro período algo tatexantes en defensa, os laranxas cobraron confianza tras o descanso para empatar e marcar distancias. Con estes tres puntos os pupilos de Juanlu afástanse dos postos perigosos de descenso; son oitavos con 13 puntos, empatados con Magna Navarra, sétimo.
Os laranxas conseguiron repoñerse do gol temperán de Dani Salgado, no minuto 2, no 12, con Matamoros en contraataque. A resposta do Marfil chegou no 16, nun control de Rafa López, de costas á portería de Álex.
Con 2-1, os burelistas saltaron á pista con máis seguridade tras o descanso. Isi devolveu a igualada para os da Mariña no minuto 23, cun lanzamento afastado sorprendendo o meta local, e no 28 Antoñito aproveitou unha perda dos locais para subir o 2-3. Superada a medianía da segunda parte (minuto 31), Jorge puxo a súa firma para o 2-4, ante o que reaccionou o Marfil con Sepe como porteiro xogador. Recortou distancias nos pés de Rafa López (minuto 35) o Marfil, aínda que Iago Míguez volveu poñer terra por medio co 3-5 no 39. Na recta final o xogo de cinco concedeulle o definitivo 4-5 ao equipo local, de Adolfo.
Ficha técnica
Marfil Santa Coloma: Álex, Rubén, Adolfo, Dani Salgado, Sepe, cinco inicial; tamén xogaron A.Segura, Eric Martell, LLuc, Rafael López, Charlie
Burela FS Pescados Rubén: Álex, Isi, Matamoros, Carlitos, Antoñito, cinco inicial; tamén xogaron Jorge, Iago Míguez, Chano, Hélder
Goles: 1-0, minuto 2, Dani Salgado; 1-1, minuto 12, Matamoros; 2-1, minuto 16, Rafael López; 2-2,minuto 23, Isi; 2-3,minuto 28, Antoñito; 2-4, minuto 31, Jorge Bellvert; 3-4, minuto 35, Rafael López; 3-5, minuto 39, Iago Míguez; 4-5, minuto 40, Adolfo
Tarxetas: Por Marfil amarela a Adolfo, Sepe, Lluc, Rafael López. Por Burela FS amarela a Matamoros, Antoñito, Hélder
Árbitros: Alonso Montesinos // Santander Flamarique.
*Foto: Prensa Marfil Santa Coloma.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
Foron os propios implicados quen contactaron co 112 Galicia pasada a medianoite deste domingo. O vehículo no que viaxaban saíuse da vía na LU-132, en Cabarcos, Barreiros. A posición na que quedou o coche, inclinado sobre un terraplén, complicou o acceso dos profesionais de Urxencias Sanitarias de Galicia-061, por iso, os xestores do Centro Integrado de Artención ás Emerxencias de Galicia avisaron aos Bombeiros de Barreiros. Finalmente, só tiveron que rescatar a un dos dous ocupantes, o copiloto, e, para iso, tiveron que cortar os asentos. Do mesmo xeito, o equipo médico só trasladou a unha persoa.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
