Son Viveiro denuncia nunha moción a escaseza de instalacións deportivas

Viveiro, 11 de agosto de 2015.- SON VIVEIRO denuncia a escaseza de instalación deportivas e, co fin de darlle solución a este problema, presentou no Concello unha Moción para o seu debate no próximo Pleno na que manifesta a necesidade de facer da actividade deportiva un apartado preferente na política municipal, por varias razóns: como complemento da saúde, como divertimento, como competición e tamén como actividade de ocupación de tempo libre de todas as veciñas e veciños, moi especialmente da xuventude que, na actualidade, está saltando ás instalacións pechadas, co conseguinte risco que isto supón para a súa integridade. Trátase de recintos aos que non podería acceder unha ambulancia no caso de producirse un incidente que requirise dos seus servizos.

Na súa proposta, denuncia o paradoxo que supón que, mentres o Concello non dispón de instalacións onde realizar as actividades deportivas coas que satisfacer a demanda, a Consellería de Cultura, Educación e Ordenación Universitaria ten as súas infrautilizadas, pechadas tanto en horario non lectivo como durante as vacacións escolares.

SON VIVEIRO propón que se busque un acordo entre as dúas Administracións e solicita, así mesmo, a realización dun estudo para buscar un lugar próximo ao casco urbano que cubra as demandas de ocio da mocidade de Viveiro; por exemplo, unha pista única de baloncesto ou unha zona onde poder practicar a monopatinaxe en boas condicións, con garantías para os e as deportistas e sen perigo para o resto de viandantes.