Comunicado sobre colaboración da Deputación con todos os concellos da provincia

Lugo, 2 de outubro de 2015.- En relación coas informacións do Grupo Provincial Socialista sobre a colaboración económica da Deputación, o Goberno provincial quere aclarar que:

1.- Tal é como xa denunciaron os populares na oposición, o PSOE non está lexitimado para dar leccións de reparto de fondos públicos, cando na última lexislatura repartiron entre concellos afíns o 93% dos fondos concedidos de xeito excepcional. Provocaron un gran desequilibrio territorial existente no reparto de fondos públicos e só o esforzo dos alcaldes permitiu facerlle fronte a estas restricións.

2.- O PSOE converteu a Deputación nun instrumento de desequilibrio, para facer un Lugo de dúas velocidades, ata o punto de crear situacións tan insólitas como que concellos da provincia realizasen achegas económicas á Deputación, en concepto de pagos de impostos e taxas, que superaban a contía concedida dende a administración provincial ao municipio.

3.- Esta é a realidade, utilizaron sempre a Deputación ao seu servizo, e agora a súa falta de moralidade lévaos a criticar a xestión dun Goberno popular que recibiu a todos os alcaldes, excepto aos que non quixeron vir, como foi o caso da alcaldesa de Lugo, ao igual que os eventos que solicitaron axuda económica, como o de Pedrafita, tamén recibiron colaboración por parte da Deputación.

4.- A maiores, son moitas as cifras que se poden dar e que demostran este feito. Na Xunta de Goberno do día 22 de maio de 2015, aprobaron 1.387.034,00 euros, para concellos da súa mesma cor política, o mesmo se deu na do 15 de maio, onde concederon 615.000 euros só para concellos do PSOE. En total, en apenas dous días, 2.002.955 euros foron para municipios en mans de PSOE.

5.- Non hai ningún dato obxectivo que poida acreditar que só axudamos aos concellos do PP e de facelo, estariamos a garantir un reequilibrio de fondos públicos, xa que os gobernos do PP durante oito anos non recibiron axuda algunha por parte do anterior Goberno socialista. Non se estarían a marxinar aos concellos, estaríanse a cumprir coas competencias de cooperación e colaboración con todos os concellos e equilibraríamos discriminacións.