32 alumn@s recibiron este martes axudas para transporte que concede o Concello de Cervo a rapaces que cursan fóra ensinanzas que non hai no municipio

Cervo, 22 de decembro de 2015.- 32 alumnos e alumnas recibiron este martes no salón de plenos da Casa do Concello de Cervo as axudas para transporte que concede o Concello a rapaces que no pasado curso 2014-15 estudaron fóra ensinanzas que non hai no municipio. Cada un deles recibiu un cheque de 200 euros para sufragar parte dos gastos de desprazamento á localidade onde estuda.

Todos os que esta tarde recibiron estas axudas cumpren cos requisitos das bases, entre os que están cursar estudos que non se impartan en centros do municipio, non superar un determinado nivel de ingresos ou ser menor de 30 anos. O alcalde de Cervo, Alfonso Villares, e a concelleira de Educación, Dolores García, fixeron entrega destes cheques aos alumnos e alumnas nun acto que tivo lugar na Casa do Concello esta tarde.
Estas axudas únense ás outras liñas de apoio á educación que ten activas o goberno local de Cervo; un exemplo son as subvencións ás entidades educativas, como os colexios e institutos, e ás asociacións de nais e pais de alumnos. Pero tamén hai outras axudas para as familias, como as de material escolar e libros para o segundo ciclo de Infantil.

“Desta maneira o Concello mantén o seu compromiso con todos os colectivos implicados na educación dos cervenses, co obxectivo de colaborar con todos eles na dinamización e mellora do ensino, complementando as accións das entidades e axudando ás familias á hora de afrontar os gastos derivados da formación dos seus fillos”, manifestou Dolores García.