O BNG exixiralle á Xunta que actúa urxentemente para garantir a volta ao traballo dos extraballadores de Arriva

A Mariña, 1 de outubro de 2017. A Deputada do BNG Olalla Rodil reuniuse na mañá de hoxe cos extraballadores da empresa Arriva, que se atopan desde o oito de agosto sen emprego e sen salario debido ao incumprimento da UTE Morán-Rodríguez de subcontratalos ao resultar adxudicataria do contrato de transporte regular “Viveiro-Ribadeo, con anexos”, asinado entre esta e a Xunta.
Segundo explicaron os propios afectados “o dous de agosto, Arriva comunicou unha subrogación que nunca chegou a facerse efectiva porque a nova concesionaria di non ter constancia de que os contratos poidan subrogarse”, relatan desde o BNG.
Os traballadores tamén lle fixeron chegar á representante nacionalista “que senten unha sensación de abandono por parte de todo o mundo, xa que hai case dous meses que viven esta situación e aínda ninguén puxo solucións enriba da mesa.”
Olalla Rodil trasladoulles a disposición do BNG para apoiar as súas demandas e comprometeuse a facerllas chegar á Xunta de Galiza a través do Parlamento.
A deputada nacionalista sinalou que “a situación ten que solucionarse inmediatamente, porque son dez familias que están a pasar dificultades por culpa da deixadez de funcións da Xunta de Galiza, que está sendo incapaz de solucionar un problema que xerou ela mesma ao poñer en marcha un nova plan de transposte casi improvisado e sen ningún tipo de estudo previo.”
Desde o BNG apoian a demanda dos traballadores de que sexa a Xunta de Galiza quen se faga cargo dos mesmos se non lle pon solución á situación que padecen.
A continuación visita á Festa da Faba en Lourenzá.
A Deputada nacionalista tamén aproveitou a visita á Mariña para acudir á Festa da Faba, onde charlou coas produtoras e produtores e onde sinalou que “festas coma estas, nas que se pon en valor o produto propio, de calidade e creando valor engadido, demostran que o rural galego está vivo e ten posibilidades. Só é preciso que as políticas públicas que se adopten sexan de apoio ao mesmo e non de afogamento, sendo conscientes da realidade sociopolítica do noso País”, manifestou en referencia á normativa que pretende sancionar o traballo voluntario nas labores agrarias.
Durante a súa visita en Lourenzá tamén intercambiou pareceres con integrantes da Plataforma en Defensa da Sanidade Pública na Mariña, que participaban nun reparto de información para a manifestación do vindeiro xoves 5 de outubro. “O BNG ten claro que as veciñas e veciños da Mariña non precisan un hospital máis grandes, pero con menos ou peores servizos. Esta comarca o que precisa é unha atención sanitaria integral o máis próxima posible ás cidadás e cidadáns. E para iso o que hai que facer é dotar ao Hospital de persoal e de medios e garantir que a atención primaria sexa unha porta de entrada ao sistema sanitario coa debida calidade.”
Olalla Rodil trasladoulles o apoio do BNG ás reivindicación da Plataforma Sanitaria e animou ás veciñas e veciños da Mariña “a saír á rúa o vindeiro xoves 5 de outubro para, igual que xa fixeron no Salnés ou Valdeorras, que a mobilización sexa un éxito e amose que a cidadanía non está disposta a seguir cedendo competencias en benefició do Hospital de Lugo, alonxando así os servizos da xente.”
A Deputada nacionalista asegurou que “se o PP volve a atopar á xente nas rúas, coma no 2013, terá que volver poñerlle freo á súa aspiración de facerlle desaparecer á área sanitaria da Mariña, igual que fixo daquela”, concluíu.