O porto de Morás contará cun contradique de 224 metros para reforzar a seguridade da flota

Marta Villaverde acudiu acompañada da presidenta de Portos de Galicia e do alcalde desta localidade, a quen lle explicou os prazos de tramitación para a licitación da obra do novo dique

Xove, 17 de outubro de 2026. A conselleira do Mar, Marta Villaverde, e o alcalde do municipio lucense de Xove, Demetrio Salgueiro, visitaron esta mañá o porto de Morás para afondar no proxecto de mellora do abrigo no que está a traballar o departamento autonómico, a través de Portos de Galicia.

Villaverde, que estivo acompañada pola presidenta de Portos de Galicia, Natalia Botana, informou ao rexedor dos prazos de tramitación previstos para a licitación da obra do novo dique que o ente público ten comprometido na localidade. A conselleira ratificou que esta actuación é unha das once obras portuarias recollidas nos orzamentos da Xunta de Galicia para a Mariña lucense en 2027.

Segundo figura no proxecto técnico, as obras contemplan a construción dun contradique de abrigo de 224 metros fronte ao porto pesqueiro, pechando a dársena cun dobre obxectivo: reforzar as condicións de abrigo do porto mellorando a seguridade da flota pesqueira amarrada e das embarcacións náutico recreativas fondeadas; e ampliar a lámina de auga abrigada, o que posibilita de cara ao futuro a ampliación das instalacións portuarias.