O Goberno galego impulsa este cambio co fin de incentivar aos promotores a substituír equipamentos antigos para adaptarse aos avances tecnolóxicos, evitando unha tramitación máis complexa e prolongada no tempo
Muras, 15 de outubro de 2026. A Xunta aprobará un incremento da variación máxima da potencia para facilitar a modernizacións dos parques eólicos existentes en Galicia a través de proxectos de repotenciación para producir máis enerxía, con menos impacto e con maiores beneficios ambientais.
Así o explicou hoxe a conselleira de Medio Ambiente e Cambio Climático, Ángeles Vázquez, durante unha visita ás obras que se están a acometer con este obxectivo no parque eólico de Muras. A representante autonómica avanzou que se modificará a normativa sectorial eólica galega, a través da próxima Lei de medidas dos orzamentos da Xunta do ano 2027, para elevar dun 10% a un 20% a variación máxima de potencia autorizada para que un proxecto de repotenciación se poida considerar unha modificación non substancial do parque orixinal.
Neste senso e dado o avance da tecnoloxía nos últimos anos e que hoxe se dispón de aeroxeradores moito máis modernos, eficientes e con maior potencia que cando se comezaron a tramitar moitos destes proxectos, o Goberno galego impulsa este cambio normativo para facilitar que os parques eólicos poidan substituír equipamentos antigos por tecnoloxía actual sen obrigalos a iniciar unha tramitación máis complexa e prolongada no tempo, pensada para cambios de moito maior alcance.
De feito, Ángeles Vázquez lembrou que as obras de modernización do parque eólico de Muras, promovido por Iberdrola, forman parte dos 9 proxectos de repotenciación autorizados pola Xunta entre os anos 2024 e 2025. En total, son 24 os parques galegos con actuacións deste tipo xa rematadas, en execución ou solicitadas e no seu conxunto permitirán reducir o número de aeroxeradores de 1.047 a só 150, 897 máquinas menos e unha redución superior ao 85%, e incrementarase nun 35% a produción de enerxía.
No caso concreto de Muras, a repotenciación permitirá substituír 74 aeroxeradores antigos por tan só 11 novos, máis modernos, eficientes e adaptados ás esixencias ambientais actuais, mantendo unha potencia de 47,3 megavatios. Ademais, os novos equipos incorporarán medidas específicas para protexer a fauna da contorna, especialmente as aves, e liberarán entre 25 e 30 hectáreas de terreo unha vez finalizadas as obras, conseguindo así un mellor aproveitamento do recurso eólico e maiores beneficios ambientais.
Procedementos máis claros, previsibles e eficientes
A maiores, Ángeles Vázquez aproveitou para lembrar que estas modificacións forman parte dunha liña de traballo máis ampla que se está impulsando desde a Consellería de Medio Ambiente e Cambio Climático para conseguir procedementos máis claros, previsibles e eficientes sen reducir nin unha soa garantía ambiental.
Nesta liña, a Conselleira incidiu en que se acababa de publicar unha guía pioneira en España para facilitar a avaliación ambiental dos proxectos cunha metodoloxía común para que se coñezan de primeira man os criterios a aplicar para elaborar os estudos de impacto ambiental, incluídos os parques eólicos. Neste caso, permitirá analizar a afectación das obras aos beneficios que proporciona a natureza ademais das afeccións sobre as especies ou os hábitats para identificar mellor os posibles impactos, comprobar a eficacia das medidas ambientais e reducir as consultas e os requirimentos posteriores que alongan os procedementos.
Para concluír, a representante do Goberno galego recordou que tanto coa nova guía como coa modificación legal para o sector eólico de Galicia o que se busca é facilitar a modernización tecnolóxica, ofrecer maior seguridade xurídica e sobre todo, manter intacta a protección ambiental.
As estudantes recibiron o galardón “Pizza Chef Emergente”, un recoñecemento que destaca o talento das novas promesas da gastronomía e que supón un importante logro para o centro educativo e para a formación profesional da comarca.
O percorrido comeza nun lugar simbólico: as pontes sobre o río Sor, que unen as provincias da Coruña e Lugo e marcan un dos vértices do territorio lucense. Con esta iniciativa, Guido Guía propón unha travesía pola diversidade paisaxística, histórica e humana da provincia, destacando a riqueza dos seus espazos naturais, monumentos e comunidades.
O delegado subliñou o importante papel que realiza o tecido social para conseguir melloras en beneficio da veciñanza e dinamizar social e culturalmente a localidade. Neste sentido, lembrou que a Xunta impulsa o movemento asociativo a través de apoios para o acondicionamento dos seus locais ou para o desenvolvemento de actividades.
A cita será o luns 19 de outubro, ás 17:30 horas, cun punto de encontro no peirao de San Cibrao. Ademais, os diferentes edificios municipais iluminaranse de cor rosa para sensibilizar á poboación sobre a importancia da detección precoz, fundamental para mellorar o prognóstico e a supervivencia das pacientes que padecen esta enfermidade.
O domingo 20 de decembro a Praza César Chavarría acollerá de 11:00 a 20:00 horas unha nova edición do Mercadiño de Nadal organizado polo Concello de Lourenzá, “unha cita para desfrutar do ambiente destas datas e compartir unha xornada especial na nosa vila”, anuncia a alcaldesa, Rocío López. O prazo de inscrición para instalar cun posto xa está aberto e a participación é totalmente gratuíta. As solicitudes poden facerse ata o 16 de decembro nas oficinas do Concello de Lourenzá ou a través do teléfono 982.121.006.
Durante 45 minutos, tres malabaristas —Pablo Reboleiro, Aitor Garuz e Santiago Montero— mergúllanse nun caos divertido onde ninguén manda e todo flúe entre xogos de poder, equilibrios imposibles e humor. A obra amosa como, no mundo dos malabares, romper os patróns establecidos pode levar a descubrir que a verdadeira maxia está en aprender a xogar xuntos.
No encontro, abordáronse temas como a posibilidade de colaborar na mellora da formación dos traballadores, destacando a importancia que ten ese aspecto neste sector estratéxico para Galicia. Tamén se trocaron puntos de vista relativos ás condicións laborais dos profesionais do mar.
