Mal tempo o e boa participación na quinta xornada do campionato de bolos de Xove

XOVE .- Nunha tarde de invernía , con fortes choivas e vento; dado que a boleira do Cruceiro é a máis dura e difícil de todas, a climatoloxía inda complicou máis as cousas, de aí os baixos tanteos, con moitas cucadas. Hai 35 inscritos: 22 na Liga Senior, 5 na Sub 18 e 8 na Liga Feminina. Excelente participación, sobre todo tendo en conta o tempo que houbo

Liga Senior.- A semana pasada incluíamos a César Cancelos dentro dos favoritos, e a súa actuación-victoria na tirada celebrada no Cruceiro confírmanos esa candidatura ao trunfo final; está claro, polo momento César Cancelos está sendo a agradable revelación do campionato neste inicio de temporada. Consolida a súa segunda posición con 43 puntos, restándolle 4 puntos ao líder Ginés Rodríguez, que con 53 puntos encabeza unha semana máis, e restándolle outros 5 puntos ao terceiro, que non é outro que José Rafael González con 33. En cuarta posición Moisés Rodríguez con 31 puntos, que tamén está a realizar unha excelente campaña, mellorando con moito os seus resultados dos últimos anos. José Manuel Cociña e Jaime Álvarez, ambos con 22 puntos, comparten a quinta posición.

Liga Sub 18.- Despois do fiasco da semana pasada, Jose Vigo volveu a realizar unha estupenda tirada, con pleno de puntos, victoria e bolada, o que lle permite seguir comodamente en cabeza con 26 puntos, 11 máis que os seus inmediatos perseguidores, Óscar Meitín e Andrés Rodríguez que levan 15 puntos cada un. A segunda posición acadada por Andrés permítelle empatar con Óscar nesa segunda posición. Nin Alex ninCristian puntuaron, polo que se quedan con 13 e 12 puntos respectivamente. Como conclusión, decir que polo momento temos un líder sólido e moi motivado, seguido por un grupo de catro xogadores nun auténtico pano.

Liga Feminina.- A líder ata esta semana Marta Álvarez non puido participar na tirada, e a segunda na clasificación (Salomé Bermúdez) leva dúas semanas sen puntuar, razón pola cal se produce un volco na clasificación provisional, pasando Carmen Roca a ocupar o liderato (con 17 puntos) despois da súa victoria no Cruceiro, seguida de Dolores Baño que ten 16. Terceira sigue Marta Álvarez con 14 e cuarta Salomé Bermúdez con 12. Continuamos polo tanto cunha gran igualdade nesta categoría, na que, por certo, xa lograron puntuar 11 mulleres distintas.

A Vindeira tirada vai ter lugar no CENTRO SOCIAL DE O A VARA-XUANCES O VINDEIRO SÁBADO, 14 DE NOVEMBRO DE 2009.