Continúan este venres as Xornadas 2026 de Nordés

O Vicedo, 21 de agosto, 2026. Este xoves 20 de agosto deron comezo as XVI Xornadas Memoria dun Tempo, organizadas pola asociación Nordés.

Esta edición estará dedicada integramente ao Concello de Mañón, do mesmo xeito que acontecera na primeira, celebrada no ano 2011.

A apertura contou coa participación do catedrático da USC e recoñecido historiador Emilio Grandío, quen contextualizou como se desenvolveu a sociedade mañonesa durante o período da II República. A continuación interviu o Cronista Oficial do Concello de Mañón, historiador e novelista Hixinio Puentes, cun relatorio centrado nos feitos acontecidos en xullo de 1936 no municipio e, especialmente, no Barqueiro, punto neurálxico da resistencia contra o golpe militar.

Pechou o acto o historiador ferrolán Xosé Manuel Suárez, quen abordou a represión posterior sufrida polos veciños de Mañón implicados na defensa da legalidade republicana, moitos deles trasladados a Ferrol, onde foron asasinados e integran hoxe o Memorial de Vítimas do Franquismo da cidade.

A mesa redonda formada por estes relatores tivo lugar no Centro Sociocomunitario de Mañón, situado na Estrada de Viveiro 3, no Barqueiro.

Programa do venres

Seguindo co previsto, a Táboa Redonda contará coa participación de Carlos Nuevo Cal, Cronista Oficial de Viveiro, entre outras cousas, e que falará dun dos lugares de memoria dos varios que hai no concello de Mañón, a ponte vella do Barqueiro, espazo que merece esa denominación por dúas causas, a primeira ser onde mariñeiros, obreiros, xente do común, fixo intención de resistir ao avance das tropas sublevadas contra a República, e a segunda por cuestión de converterse a partir deses días en zona de “paseo”, que é o mesmo que dicir de “asasinato”, xa que foron varias as persoas executadas naquel lugar polos franquistas.

Outro lugar de memoria do concello, esta vez o cemiterio das Ribeiras do Sor, será tratado polos seguintes relatores pero dende dúas perspectivas distintas. Primeiramente falará Lucia Santiago, investigadora do grupo Histagra (Historia Agraria e Política do Mundo Rural. Séculos XIX e XX) da USC e parte do equipo do Plan de Memoria Democrática de Galicia, sobre os seus traballos dirixidos á reapertura da foxa que hai nese cemiterio. A súa intervención leva por título: “O Plan Cuadrienal de Memoria Democrática e a investigación histórica da fosa de Ribeiras do Sor”

Fernando Ocampo, investigador e directivo da asociación Memoria Histórica de Ferrol, poñerá nomes, caras, oficios, vivencias, etc, ás persoas asasinadas no cemiterio das Ribeiras, homes levados alí para nunca máis volver dende os concellos nos que residían, concretamente Cedeira e Ferrol.

A asociación Nordés quere salientar o carácter especial destas xornadas, ao celebrarse por primeira vez sen a presenza de Hilda Farfante Gayo, figura imprescindible que acompañou numerosas edicións e faleceu recentemente. Por este motivo, antes do inicio dos relatorios realizarase un pequeno acto en lembranza desta mestra, amiga e compañeira.