“Mulleres no mundo, II edición” proxecta a película Agua no salón de actos da UNED en Foz

Nota e prensa
OBSERVATORIO DA MARIÑA POLA IGUALDADE

Continúa o video-forum “MULLERES NO MUNDO, II EDICIÓN” coa proxección da película Agua

Na  sesión, que se desenvolverá este venres día 26 ás 19.00h  na UNED, visionarase a película Agua (India) dirixida por Deepa Mehta

O vídeo-forum “MULLERES NO MUNDO, II EDICIÓN” é organizado polo Observatorio da Mariña pola Igualdade, en colaboración coa UNED e con Radiofoz, para achegarlle mediante o cinema á cidadanía mariñá e galega a realidade vital de mulleres moi diversas pertencentes a ámbitos sociais e culturais afastados e distantes.

O vídeo-forum “MULLERES NO MUNDO” que comezou o pasado día 5 de novembro, ten lugar no salón de actos da UNED en horario de 19h. a 21 horas. Na actividade poden anotarse todas as persoas que o desexen, estándose a tramitar créditos de libre configuración para as persoas participantes. Quen desexe inscribirse na actividade, totalmente gratuíta, debe pórse en contacto coa UNED de Foz, ben escribindo un correo electrónico a foz@lugo.uned.es, chamando por teléfono ao 982133699 ou acudindo presencialmente ás aulas da universidade en Foz (sitas na rúa Castelao, s/n).

As sesións de “MULLERES NO MUNDO” están guiadas por membras do Observatorio da Mariña pola Igualdade. A metodoloxía a seguir consiste en realizar unha breve presentación e contextualización do filme,  para a continuación realizar o visionado da película que corresponda a cada día. Posteriormente, realizarase un debate e reflexión posterior sobre diferentes aspectos abordados en cada filme, seguindo sempre unha metodoloxía participativa e aberta na que a monitora sexa condutora das reflexións do grupo.

A película correspondente a este venres é Agua (India) e está dirixida por Deepa Mehta. Agua conta unha intimista, tenra e dura historia de amor marcada pola presenza dunhas viúvas hindús que viven recrutadas e condenadas a todo tipo de privacións. No ano 2000, despois de obter todos os permisos necesarios e a aprobación do guión por parte do goberno da India, comezouse a rodaxe en Varanasi. Aos dous días desatáronse violentas protestas protagonizadas por fundamentalistas. Acusouse á película de ir en contra da relixión hindú, os decorados foron destruídos e as manifestacións polas rúas sucedéronse até que a rodaxe foi suspendida.

O proxecto tardou catro anos en volver a poñerse en marcha. Tras rodar varias películas sobre a sociedade india (“Fuego”, “Tierra”), Deepta Mehta converteuse en persoa “non grata” no seu país por ter ensinado ao mundo imaxes rexeitadas pola cultura india.

O principal obxectivo que persegue o Observatorio da Mariña pola Igualdade con esta iniciativa é a de darlle a coñecer á cidadanía galega, homes e mulleres, as realidades vitais de mulleres moi diversas de Afganistán, India, Irán e Israel. Deste xeito, pretendemos destacar, por un lado, que a discriminación de xénero é unha cuestión universal que afecta a todas as mulleres do mundo, aínda que adquire unhas materialización diferentes en función das continxencias que definen cada sociedade e cultura. E polo outro, que non hai un único xeito de “ser muller” nin unha esencia feminina, senón que a pluralidade de experiencias vitais e de desexos das mulleres obríganos a ter sempre en conta a enorme diversidade de mulleres. Alén deste obxectivo principal, desde o Observatorio preténdese tamén contribuír a pór en valor as contribucións das mulleres aos distintos eidos do saber, destacando neste caso o traballo das directoras de cinema.