O alcalde de Ribadeo agarda que a Deputación licite con urxencia as obras da ponte de Arante

Nota de prensa:
FERNANDO SUÁREZ AGARDA QUE A DEPUTACIÓN LICITE CON CARÁCTER DE URXENCIA AS OBRAS DA PONTE DE ARANTE, AGORA QUE A XUNTA LLE DEU O VISTO BÓ AO PROXECTO PRESENTADO POLA INSTITUCIÓN PROVINCIAL.

Ribadeo, 26 de xaneiro de 2011. O alcalde, Fernando Suárez, agarda que a Deputación licite con carácter de urxencia as obras da ponte de Arante, agora que a Xunta lle deu o visto bó ao proxecto presentado pola institución provincial. O rexedor participou esta mañá en Santiago na xuntanza do comité asesor do Camiño de Santiago no que se abordou esta cuestión.

Suárez Barcia relatou que “eu estiven nesta xuntanza do comité asesor do Camiño de Santiago con voz, pero sen voto, e podo dar a boa nova de que por fin este proxecto contará co informe favorable da Xunta con algunhas correccións que terá que facer a Deputación, pero con estas suxerencias incluidas xa poden proceder a licitar as obras, sen ter que voltar o proxecto a este comité asesor do Camiño”.

O alcalde dixo que “por fin despois de sete meses de discusións entre Xunta e Deputación parece que todo se está poñendo ben para que canto antes se poidan licitar estas obras tan importantes. Terán que ser licitadas pola Deputación e agardo que o faga con carácter de urxencia para que sexa posible que na primavera volte a estar operativa esta ponte de Arante, que tantas molestias está a ocasionar aos veciños das parroquias afectadas, aos conductores dos autobuses escolares, á maquinaria agrícola pesada… Todos teñen que dar uns rodeos enormes e as pistas municipais polas que está a pasar toda esta maquinaria e o tráfico pesado as están estropeando de xeito acelarado. A ver si agora estamos no principio do fin para que esta ponte sexa xa unha realidade”.