Concellos da Mariña asinaron con Medio Rural convenios para a mellora das infraestruturas rurais

Nota de prensa

Medio Rural asinou hoxe en Cervo os convenios para a mellora das infraestruturas rurais

Juárez asinou hoxe en Cervo os convenios para a mellora das infraestruturas rurais

*      En total, son 14 concellos da zona os que se beneficiarán dos Proxectos Estratéxicos de Infraestruturas no Medio Rural

Santiago, 30 de marzo de 2011.- O titular de Medio Rural, Samuel Juárez Casado, reuniuse hoxe, no Concello de Cervo (Lugo), para asinar os convenios sobre Proxectos Estratéxicos de Infraestruturas no Medio Rural (PEIM) cos distintos alcaldes dos concellos que se beneficiarán deste investimento. O obxectivo fundamental destas obras é dignificar e mellorar a calidade de vida da poboación que reside nestas zonas e contribuír a arranxar as deficiencias que persisten en determinadas zonas rurais de Galicia.

O PEIM Rural é un plan que inclúe proxectos financiados pola Consellería do Medio Rural e o Ministerio de Medio Ambiente e Medio Rural e Mariño co fin de levar a cabo actuacións en materia de desenvolvemento rural. No convenio establécese un marco xeral de cooperación onde se definen as liñas xerais de colaboración técnica e financeira en materia de infraestruturas rurais.

Obxecto e Actuacións
O convenio establece que o Ministerio, a través da Dirección Xeral de Desenvolvemento Sostible do Medio Rural, colabore no financiamento de actuacións relativas a camiños agrícolas e pistas rurais. Pola súa parte, a Xunta de Galicia realizará actuacións de infraestrutura rural. A estas infraestruturas, que están financiadas integramente pola Xunta, sumaranse outras novas cando o Ministerio aporte a súa parte.

O órgano encargado de realizar o seguimento de execución e cumprimento das actuacións obxecto do convenio é a Comisión de Seguimento, integrada por persoas de ámbalas dúas Administracións.

Concellos beneficiarios
Os concellos que se beneficiarán destas melloras son Alfoz, Barreiros, Burela, Cervo, Foz, Lourenzá, Mondoñedo, Muras, Ribadeo, Riotorto, O Valadouro, O Vicedo, Viveiro e Xove.