Ribadeo abre un local social para asociacións coa axuda da área de Cultura da Deputación

Nota de prensa 1/2

HOXE ABRE AS SÚAS PORTAS EN RIBADEO UN LOCAL DE ENCONTRO PARA AS ASOCIACIÓNS VECIÑAIS. TRÁTASE DUN ANTIGO LAVADOIRO, QUE FOI REHABILITADO GRAZAS AO CONCELLO E Á ÁREA DE CULTURA DA DEPUTACIÓN DE LUGO.

Ribadeo, 28 de marzo de 2010. Hoxe abre as súas portas en Ribadeo un local de encontro para as asociacións veciñais. Trátase dun antigo lavadoiro, que foi rehabilitado grazas ao Concello e á Área de Cultura da Deputación de Lugo. O alcalde, Fernando Suárez, subliña que así se satisface unha demanda que desde hai tempo tiñan eses colectivos.

O rexedor sinalou que “despois de varios meses de obras, puxemos en funcionamento e abrimos un local de encontro para asociacións veciñais, fundamentalmente de Ribadeo, debido a que elas desde hai tempo viñan demandando un espazo onde poder celebrar as súas xuntas. O Concello non tivo ata o de agora moitos espazos para poder utilizalos para esta finalidade”.

Suárez Barcia explicou que “tiñamos un antigo lavadoiro de principios do século XX, que nos últimos lustros era utilizado coma un almacén municipal de cachivaches. Eliminamos todo iso, cun taller de emprego iniciamos a rehabilitación do inmoble, sendo estritos cos criterios de patrimonio, e a onde non chegaron eses rapaces e rapazas, que o fixeron moi ben, conseguimos unha financiación da Área de Cultura da Deputación de Lugo para poder rematar eses traballos e para converter ese lavadoiro nun moderno local de reunións para asociacións”.

O alcalde lembrou que “o local, que vai cubrir unha carencia moi importante, está enclavado no casco vello e incluso moita xente de Ribadeo non sabe da existencia desta infraestructura. Penso que cando a vexan van quedar maravillados de cómo se rehabilitou e do servizo que vai prestar a todo este movimento asociativo tan importante que temos en Ribadeo, que nos últimos anos se foi reforzando, e desde o Concello queremos poñerlles instrumentos para que poidan facer o seu labor de reunión e de proposta correctamente”.

Fernando Suárez convidou “a todo este movimento asociativo para que hoxe, nunha xornada de portas abertas, se poidan pasar por alí e poidan no futuro inmediato, a partires de mañá mesmo, empezar a utilizar esa infraestructura tan bonita, tan esquecida e que quedou tan ben rehabilitada aquí en Ribadeo. Todos os veciños están convidados a achegarse a esta nova instalación”.

Nota de prensa 2/2

ANTONIO VEIGA ASISTIU Á INAUGURACIÓN DO NOVO ESPAZO DE REUNIÓNS PARA AS ASOCIACIÓNS RIBADENSES, NO ANTIGO LAVADOIRO DO CONCELLO

A Área de Cultura financiou esta obra con 25.186 euros, en resposta á necesidade das asociacións do
concello mariñao, que viñan reclamando dende hai tempo unhas instalacións axeitadas nas que reunirse

RIBADEO, 28 de marzo de 2011. O delegado de Cultura da Deputación de Lugo, o nacionalista Antonio Veiga, asistiu esta tarde á inauguración do novo espazo de reunións para as asociacións de Ribadeo, acompañado polo alcalde do concello, Fernando Suárez Barcia. O novo local está situado no antigo lavadoiro e foi acondicionado grazas á Área de Cultura, que achegou 25.186 euros para as obras. O antigo edificio dos lavadoiros, que se atopa no casco antigo de Ribadeo, convértese así nunha infraestrutura axeitada ás necesidades das asociacións que desenvolven nel a súa actividade.

Segundo explicou Veiga, “cúmprese unha nova demanda dos ribadenses, esta vez no que atinxe ao movemento asociativo veciñal, xa que con este centro poderán á fin desenvolver as súas xuntanzas dun xeito máis cómodo e axeitado”. Afirmou que “deste xeito, a Área de Cultura da Deputación sigue na liña que se marcou ao comezo de proporcionar facilidades na medida do posible ao movemento asociativo lucense, xa que estes pequenos colectivos son quen máis o precisa nestes tempos”. O alcalde de Ribadeo deu as grazas á Área de Cultura por axudar ao concello con esta achega, que posibilitou a Ribadeo non só rehabilitar un inmoble que estaba practicamente en desuso, senón tamén empregalo para un obxectivo útil, xa que Ribadeo é un concello moi vivo, e cada vez máis, en materia asociativa”.