ADEGA e ERVA critican á Xunta por non compensar os danos do xabarín e impulsar batidas en época de cría

Nota de prensa

*ADEGA E ERVA CRITICAN A DECISIÓN DE MEDIO RURAL DE PERMITIR BATIDAS AO XABARÍN
EN ÉPOCA DE CRÍA E EN ESPAZOS DA REDE NATURA 2000*

Imaxe tomada da web adega.info

*3 de maio de 2011.* Os grupos ecoloxistas ERVA e ADEGA queren denunciar ante a
opinión pública a regresión en materia de política de xestión e conservación da
fauna que supón, en primeiro lugar, a negativa da Xunta a compensar os danos do
porco bravo e, en segundo lugar, o impulso da celebración de batidas para
controlar a poboación desta especie en época de cría e mesmo dentro de zonas
protexidas.

A política de facto de non pagar as compensacións, cuxos expedientes están
paralisados desde finais do ano pasado, está en relación co recorte do gasto
público no contexto da crise que padecemos. Esta actitude revela a política
regresiva do goberno autonómico en materia de conservación. O intento morno da
Xunta de derivar a responsabilidade eNotade conómica dos danos aos TECOR
finalmente concretouse, por electoralismo, na renuncia de Medio Rural a implicar
ás sociedades cinexéticas, nas que residiría unha parte da responsabilidade como
así ven recollido na Lei de Caza.

É chamativo que se sigan inspeccionando danos aos cultivos por parte da gardería
de conservación, se no existen fondos públicos para pagalos. Algúns expedientes
levan sen pagar dous anos, coa única intención e de acalar aos afectados e
evitar protestas antes das eleccións. Tal é o xeito de conducirse do actual
director xeral de conservación que antepón as cuestión partidistas á verdadeira
solución dos problemas existentes vencellados á actividade cinexética.

Como consecuencia, a única actuación que lle resta a Medio Rural é a aplicación
das excepcionalidades contempladas na Lei de Caza. Estas excepcións son norma na
xestión do porco bravo dende 2009, e acandan maior gravedade neste ano. A
celebración sistemática de batidas en época de cría das especies salvaxes non
teñen xustificación debido á falla de información demográfica rigorosa sobre as
poboacións de xabarín.

Estas batidas, nas que se irrompe no monte con cans, teñen unha incidencia
negativa sobre a fauna cinexética e non cinexética, ao posibilitar que se
malogren as crías das distintas especies de mamíferos e aves que comparten o
habitat co porco bravo. Especies de aves de presa como a tartaraña cincenta, a
gatafornela (ambas as dúuas ameazadas) ou a avenoiteira, outras aves como a
perdiz e mamíferos como a lebre, o coello ou o lobo vense afectadas por esta
irrupción en plena época de crecimento das crías. Nen sequera se contempla que
as prácticas cinexéticas autorizadas nesta época sexan modalidades máis
selectivas (tipo esperas nocturnas) e non xeralistas (ganchos e monterías).

As batidas nesta época, ao coincidir coas estacións de máximo risco de incendios
e derivarse boa parte do persoal á realización de labores de extinción poden
contribuir ademais a fomentar o furtivismo, xa que non hai sificiente persoal
para controlar os milleiros de batidas que poden organizar.

A aplicación desta manga ancha coas batidas, cobra maior gravidade nos espazos
protexidos da Rede Natura 2000 ou cando para o caso, revísase a condición de
terrenos vedados criados precisamente criar refuxios de fauna e garantir a
persistencia das poboacións.

Por estas razóns, ERVA e ADEGA reclamaos da Xunta que, denantes de seguir
autorizando batidas en época de cría, clarifique o modelo de pagamento dos danos
do xabarín, ben através da responsabilización dos TECOR ou ben por medio dos
orzamentos públicos da Xunta. Apostamos pola aplicación dunha política integral
e transversal de xestión do xabarín do medio rural, diversificando as política
forestal, agraria e gandeira para mellorar a sustentabilidade e harmonizar as
políticas produtivas coa conservación da natureza.As solucións deben ser
consensuadas por todas as partes e non como se está a facer na actualidade: o
borrador da nova Lei de Caza contén importantes medidas que están a ser
negociadas e consensuadas co lobby da escopeta.