A Comisión Defensa da Sanidade chama aos veciños e veciñas, asociacións e partidos de Foz a unha concentración

Nota de prensa

CHAMAMENTO DA COMISIÓN FOCEGA EN DEFENSA DA SANIDADE PÚBLICA AOS VECIÑOS E VECIÑAS, ASOCIACIÓNS E PARTIDOS DE FOZ.

Nos últimos días téñense anunciado dúas medidas que van supoñer un grave deterioro da calidade da sanidade pública no noso concello: A supresión do servizo de noite da ambulancia da casa do mar, e a desaparición do actual servizo de urxencias polas tardes no Centro de Saúde, que pasa a ser atendido por médicos de cupo que deberán atender aos seus pacientes e mais aos de urxencias.

Dúas medidas que representan unha agresión máis aos intereses dos veciños, porque ademais de negarnos as urxencias as 24 horas no Centro de Saúde, pretenden agora recortar dous servizos que xa tiñamos, e que tanto nos custou a todos conseguir.

Diante disto, A Comisión convócavos a asistir á concentración que terá  lugar o sábado, dia 03 de setembro, as 12 da mañá na Avenida da Mariña, para reclamar estes servizos que se nos negan.

Non hai lugar para o desánimo: se loitamos podemos perder, pero se non loitamos estamos perdidos!

É o momento de estarmos unidos para defendermos a sanidade pública no noso concello.