O BNG ve que nos primeiros meses de goberno municipal de Burela a xestión foi nula e sen ningún novo proxecto

Nota de prensa

BALANCE DOS PRIMEIROS MESES DO GOBERNO MUNICIPAL DO PP EN BURELA: NULA XESTIÓN E NINGÚN PROXECTO NOVO

De nula xestión e ningún proxecto novo para o noso pobo cualificamos, dende o BNG, a actuación do equipo de goberno do PP en Burela nestes primeiros meses de mandato. E unha proba disto é o contido do Pleno Municipal que se celebrou este xoves: despois de máis de tres meses de goberno, o PP de Burela só é quen de presentar tres cuestións de mero trámite ou simples declaracións de intencións que dan mostra da súa nula capacidade de xestión e ningún traballo polo noso pobo.

En máis de tres meses de goberno, o PP só é capaz de presentar para aprobar no Pleno tres asuntos: o nomeamento, a efectos administrativos do catastro, de varios camiños do pobo, un modelo de regulamento para crear un Consello da Xuventude en Burela (que non foi consensuado nin participado con ningunha asociación do pobo, excepto coas Novas Xeracións do seu partido) e propoñer iniciar os trámites para a declaración da zona xeolóxica do Perdouro como Espazo Natural de Interese Local (un acordo que xa aprobaramos no anterior goberno municipal e que agora o PP propón ratificar sen aportar nada novo, sen presentar sequera unha proposta de plan de actuacións).

E nada máis. Esta é a xestión que demostra o PP de Burela dende que está gobernando. Porque, ao longo do verán, o único que vimos que fixera o novo equipo de goberno foi visitar as obras que se están realizando con cargo ao Plan extraordinario da Deputación e que xa deixaramos tramitadas o anterior goberno. Iso, ademais de anunciar que van cobrar polas actividades para as mulleres e para os maiores (porque son incapaces de xestionar novos recursos económicos) e continuar coas escusas de que non hai cartos para non facer nada (unha desculpa que, día si e día tamén, utiliza o PP na Xunta de Galiza e noutras comunidades do Estado para encubrir os graves recortes sociais que está levando a cabo). Porque, non é de recibo que o PP de Burela se queixe do estado das contas do noso concello cando os números que o anterior equipo de goberno deixamos no mes de xuño deste ano son moitísimo máis positivos que a herdanza que o PP nos deixou no ano 2007 (e proba disto é que o PP aprobou a Conta Xeral que presentamos como balance do ano 2010; se tanto desfase había, como din eles, porque votaron a favor?)

En resumo, temos un Alcalde que vai cobrar preto de 50.000 € ao ano e outros dous concelleiros con dedicación exclusiva que presentan este balance de traballo despois de máis de tres meses: ningún proxecto novo, ningún proxecto ilusionante de futuro para Burela que cree emprego e ningunha xestión que xenere ingresos para o concello. Pero si empezar a cobrar por todo e mentir sobre as contas municipais que eles mesmos aprobaron.