O PP oponse a restaurar os servizos de transporte sanitario recortados en Foz

Nota de prensa

O PP OPONSE A RESTAURAR OS SERVIZOS DE TRANSPORTE SANITARIO RECORTADOS EN FOZ, BAIONA, MARÍN, PONTEAREAS E VIGO

A deputada do G.P do BNG Ana Luisa Bouza lamenta que para o PP “as ambulancias que agardan unha urxencia estean ociosas” e advirte que o goberno da Xunta está “xogando coa saúde da xente para garantir os beneficios das concesionarias”

Santiago de Compostela, 27 Setembro 2011.- O Partido Popular amosouse hoxe contrario a restaurar os servizos de transporte sanitario recortados nas bases de Foz, Baiona, Marín, Ponteareas e Vigo votando en contra dunha proposicion non de lei do BNG con esta reclamación, “modesta, concreta e contundente porque estamos ante unha emerxencia”, advertiu a deputada nacionalista Ana Luia Bouza.

A parlamentar reivindicaba tamén reorganizar os servizos deste transporte para mellorar a súa prestación, sen recortar os efectivos cos que conta na actualidade, co obxecto de garantir a calidade do servizo e a igualdade de acceso aos mesmos.

Bouza explicou que trouxo esta proposta á Cámara ao confirmarse as denuncias sobre os recortes neste servizo que xa agoirara meses atrás, cando se aprobou o novo decreto que regula o transporte sanitario, “recortes que o goberno reiteradamente se negou a recoñecer mais que dende o mes de Agosto topan con outra realidade”.

Neste sentido, lembrou que o debate está na rúa, incluso con folgas dos traballadores de ambulancias de servizos urxentes e non urxentes, que rexeitan esta “reorganización” e os recortes na dotación de servizos que xa se aplicaron nas cinco bases citadas.

A deputada dixo que era obriga dun goberno ser riguroso e garantir unha prestación en termos de calidade e homoxeneidade, non en termos de mellorar a “carta de resultados da patronal das ambulancias”, negándose a mellorar a condicións das concesións pero aceptando precarizar o servizo.

Bouza puxo algún exemplo desta precarización, como que as Uvis móbiles agora se poidan adicar a transportar doentes entre hospitais; reducir de catro a tres os tripulantes destas ambulancias; eliminar os técnicos de emerxencias; adicar o 065, que non ten persoal sanitario, a traslados de diálises; primar o criterio de número de servizos prestados ao poboacional, cando a OMS recomenda unha ambulancia por cada 25.000 habitantes ou abrir a porta ao copago, pois se elimina na redacción do novo decreto a textualidade que garante a gratuidade.

A parlamentar concluiu pedindo ao Partido Popular que rectifique o seu discurso, pois está faltando ao respeto á cidadanía e incluso aos profesionais ao afirmar que “os das ambulancias están ociosos mentres esperan unha urxencia. Están xogando coa saúde da xente para garantir os beneficios das concesionarias”.