Cervo pide á Deputación a ampliación do Museo do Mar e a apertura do acceso ao polígono de Cuíña

Nota de prensa:

O GOBERNO MUNICIPAL DE CERVO PÍDELLE Á DEPUTACIÓN A AMPLIACIÓN DO MUSEO DO MAR E A APERTURA DO VIAL DE ACCESO Ó POLÍGONO DE CUIÑA.

A concelleira Pilar Álvarez, despois das declaración vertidas nos medios de comunicación pola concelleira socialista, Lara Méndez, poñéndose medallas por conseguir para Cervo unha parte dos fondos para executar as obras incluídas no Plan de Comunidades Veciñais da Deputación, quere expoñer a realidade aos cervenses.

A edil explica que “a Lara Méndez esquecéuselle, ben seguro de xeito intencionado, que ditas obras están cofinanciadas polo Concello e que se levan executando dende os gobernos do Partido Popular na Deputación”. Polo tanto, para Álvarez, o único que lle temos que “agradecer” a Méndez é “non ter eliminado este Plan de Comunidades Veciñais e seguir así desfavorecendo a este Concello como ten feito poñendo unha multa de 23.000 euros”.

Dende o Goberno de Cervo o que si queremos lembrarlle e pedirlle, unha vez máis, á Deputación, son investimentos en firme para este Concello e esforzos reais, fóra dos plans xenéricos que a Deputación ten con todos os concellos de Lugo, e non só con Cervo, como é o caso deste referido Plan de Comunidades Veciñais.

Por todo isto, volvemos solicitarlle á Deputación que execute as obras para a apertura do vial de acceso ó Polígono de Cuíña, unha obra moi necesaria para o desenvolvemento do tecido industrial do noso municipio, e a adquisición dos terreos anexos ao Museo do Mar para facer a ampliación do Museo, como os veciños deste Concello se merecen.