María Loureiro aborda coa Deputación novos proxectos e liñas de colaboración para Viveiro

Viveiro, 20 de marzo, 2026. María Loureiro García, presidenta do PSOE de Viveiro e asesora da Deputación de Lugo, mantivo hoxe unha reunión de traballo coa presidenta da Deputación na que se trataron diferentes cuestións relevantes para o municipio de Viveiro.

Durante o encontro abordáronse liñas de colaboración e proxectos que a Deputación continúa mantendo co Concello, independentemente da cor política do goberno municipal. Entre eles destacan achegas como a subvención nominativa de 35.000 euros destinada á carpa da Semana Santa —na que se alberga a antesala do museo— ou o apoio ao Resurrection Fest, cunha achega de 150.000 euros a un evento internacional consolidado en Viveiro desde hai máis de 20 anos.

María Loureiro puxo en valor o papel da Deputación como institución que segue apoiando aos concellos sen atender a criterios partidistas, garantindo a continuidade de proxectos importantes para a veciñanza.

Neste sentido, destacou tamén que a Deputación de Lugo mantén unha actitude de colaboración permanente co Concello de Viveiro, recibindo á alcaldesa e ao equipo de goberno en varias ocasións ao longo deste primeiro ano de mandato.

Fronte a esta actitude, María Loureiro sinalou o contraste coa Xunta de Galicia, que —afirmou— mantén un desprezo continuado cara Viveiro, sen atender nin dar resposta ás necesidades do municipio e bloqueando durante anos tramitacións e investimentos fundamentais.

A reunión permitiu seguir avanzando no seguimento de proxectos e cuestións de interese para Viveiro, co obxectivo de que o municipio continúe recibindo o apoio necesario para o seu desenvolvemento.