O Observatorio celebra o seu cuarto aniversario de andaina feminista e o Día Internacional das Mulleres

Nota de prensa:

O Observatorio celebra o seu cuarto aniversario de andaina feminista e o Día Internacional das Mulleres con diversos actividades durante o mes de marzo

O primeiro acto terá lugar o próximo 1 de marzo, coa presentación do libro “Cartografías do derrubo” de Carme Adán, no que se aproveitará para reflexionar sobre xornalismo, política e mulleres

O próximo 8 de marzo, Día Internacional das Mulleres, o Observatorio celebrará o seu cuarto aniversario de andaina feminista pola Mariña de Lugo. Nestes catro anos de traballo, leváronse a cabo numerosas actividades nas distintas localidades mariñás, sempre pensadas en prol da igualdade. Charlas café desde un punto de vista de xénero sobre temas de actualidade, video-forums para coñecer a situación das mulleres doutras culturas e para visibilizar o traballo das directoras de cinema, campaña e proxectos cos IES mariñás para previr a violencia de xénero no alumnado de secundaria, cursos de fotografía dixital,o concerto Músicas e letras en feminino, para valorar o traballo das artistas da zona, diversas campañas informativas, denuncias públicas, etc.

Entre as actividades que se levarán a cabo o próximo mes de marzo, enmarcadas todas na celebración do 8 de marzo – Día Internacional das Mulleres – cabe destacar a presentación do último libro de Carme Adán “Cartografías do derrubo. Escribir ao xornal”, que terá lugar o próximo día 1, ás 20.00h, na Casa das Letras de Ribadeo. O acto, que servirá tamén para facer unha reflexión conxunta sobre xornalismo, política e mulleres, contará coa presenza de Carme Adán (autora do libro), Mari Luz Älvarez Lastra (Concelleira de Igualdade e Cultura do Concello de Ribadeo), Luísa González (Presidenta do Observatorio da Mariña pola Igualdade), Lucía L. Bayo (xornalista) e Xavier Paz (director editorial de Difusora de Letras, Artes e Ideas).

Cómpre destacar tamén, entre as actividades que o Observatorio levará a cabo durante o mes de marzo:

– Homenaxe ás mariscadoras de Rinlo, o 10 de marzo, no que intervirá Adela Figueroa, escritora, e Celsa Sánchez, ilustradora.

– Campaña de información e difusión pola Mariña da nova normativa, que entrou en vigor o pasado 1 de xaneiro, do réxime das traballadoras do fogar.

– Participación na campaña nacional do 8 do marzo “Mulleres galegas, en loita polos nosos dereitos”, convocada por diversos colectivos de Galiza, e que terá o seu punto central na manifestación prevista en Santiago de Compostela para o domingo 11 de marzo.