A Deputación convoca 24 novas bolsas de emprego para formar guías especializados nas Reservas Terras do Miño e Os Ancares
– Lara Méndez e Sonsoles López anunciaron que os beneficiarios recibirán 145 horas de formación a custe cero e logo traballarán como bolseiros entre xuño e setembro, período durante o que percibirán unha remuneración neta mensual de 700 euros
– Desenvolverán actividades recreativas, culturais, divulgativas e de concienciación, ademais de recompilar información de interese sobre as Reservas, co obxectivo de “fomentar a economía medioambiental e un turismo sostible e de calidade: o ecoturismo”
– Os interesados teñen que enviar entre os días 23 e 29 de abril, xunto ó currículo, un modelo de solicitude que poderán atopar na web provincial ás direccións terrasdomino@deputacionlugo.com ou ancareslucenses@deputacionlugo.org
A Vicepresidenta Segunda da Deputación, Lara Méndez, e a Deputada de Medio Ambiente e Enerxías Renovables, Sonsoles López Izquierdo, presentaron este xoves en rolda de prensa un novo programa de bolsas de emprego a través do que o organismo provincial formará a 24 persoas como guías medioambientais especializados nas Reservas Terras do Miño e Os Ancares Lucenses. “A súa labor será difundir e recompilar información sobre os recursos paisaxísticos, ambientais e etnográficos destes espazos naturais co obxectivo de fomentar a economía medioambiental e un turismo sostible e de calidade: o ecoturismo”, subliñou Méndez. Esta iniciativa enmárcase na aposta da institución luguesa por “consolidar o medio ambiente como unha oportunidade económica de futuro para a provincia, capaz de xerar emprego e fixar poboación”, asegurou a Vicepresidenta.
O programa de guías medioambientais, que conxuga a dinamización do mercado laboral e a difusión dos valores naturais de Lugo, desenvolverase a través do convenio que a Deputación ten asinado co Ministerio de Medio Ambiente para impulsar as Reservas Terras do Miño e Os Ancares. Deste xeito, o Ministerio financia o 66% do plan de bolsas de emprego, que está dotado con 141.600 euros.
Haberá 12 bolseiros por cada Reserva e o proxecto estrutúrase en dous piares:
– En primeiro lugar, os beneficiarios recibirán de xeito gratuíto formación como monitores guías das Reservas Terras do Miño e Os Ancares durante 145 horas. “Para que se fagan unha idea da calidade da formación que van recibir, coméntolles que unha persoa a título individual tería que pagar por ela 900 euros”, destacou a Vicepresidenta.
– En segundo lugar, os participantes farán prácticas remuneradas durante 4 meses, entre xuño e setembro. Cada un dos bolseiros percibirá unha remuneración neta de 700 euros ó mes. Neste período, realizarán diversas actividades recreativas, culturais, divulgativas e de sensibilización no territorio das Reservas. Así mesmo, recompilarán todo tipo información de interese sobre estes espazos, que será incorporada ó navegador xeográfico www.delugo.org A Deputación puxo en marcha este Google medioambiental das Reservas da Biosfera a principios do pasado ano con fondos europeos de Lug02. O portal web permite ó usuario navegar por un mapa da provincia, obtendo información sobre que visitar, onde comer ou aloxarse e ofertas de lecer dos lugares que lle interesen. “Xa no momento da súa presentación avanzamos que este navegador xeográfico estaría en constante cambio e innovación, de xeito que ós contidos iniciais se irían sumando progresivamente outros de utilidade para o cidadán. Co programa de guías medioambientais facemos que esa continua actualización de contidos sexa posible”, indicou Lara Méndez.
Como inscribirse
O vindeiro luns, día 23, abrirase o prazo para que as persoas interesadas en participar neste novo programa se anoten, algo que poderán facer ata o domingo 29 de abril. Para elo, deben entrar na páxina web www.deputacionlugo.org onde atoparán na portada dende o mesmo luns, o día da apertura do prazo, un modelo de solicitude, que teñen que cubrir e enviar por correo electrónico á: terrasdomino@deputacionlugo.org ou ancareslucenses@deputacionlugo.org dependendo da Reserva na que desexen desenvolver estas accións formativas e prácticas. A Deputada de Medio Ambiente aclarou neste senso “que cada interesado poderá optar soamente ó proceso de selección dunha das Reservas, a que prefira”. Co modelo de solicitude deben adxuntar o currículo e méritos que consideren.
En canto ó proceso de selección, López Izquierdo explicou que os aspirantes deben contar como mínimo co certificado de escolaridade. Para a selección valorarase que o currículo se adecúe ás funcións de guía medioambiental e ó desenvolvemento das tarefas a desempeñar dentro das Reservas, así como a actitude cara o posto de traballo.
O proceso completarase cunha entrevista persoal que terá como finalidade apreciar o grao de interese, madurez e dominio dos coñecementos, ademais da formación acreditada no currículo, en relación coas prácticas a realizar.
Riqueza forestal da provincia
Por outra banda, a Deputada de Medio Ambiente realizou unha valoración do estudo elaborado polo Centro de Investigación Ecolóxica e Aplicacións Forestais (CREAF) da Universidade Autónoma de Barcelona sobre a retención de emisións de CO2 en España. “Os resultados da provincia de Lugo sobre a absorción deste gas, principal responsable do efecto invernadoiro e do cambio climático, son excelentes, debido á gran riqueza forestal coa que contamos”. López Izquierdo ofreceu dous datos “para contextualizar os resultados do informe”:
– Por un lado, os 2,5 millóns de toneladas de dióxido de carbono que reteñen os bosques lucenses supoñen o 4% de toda España.
– Por outro, esa cantidade duplica a media das provincias españolas, que se sitúa en 1,3 millóns de toneladas.
Hai que ter en conta, como lembrou a Deputada, que, segundo o Inventario Forestal Nacional (IFN), a superficie forestal ocupa un 68% do total de Lugo e desta, un 63% é monte arborizado, unhas 422.000 hectáreas, que supoñen o 35% do total galego. “Na Deputación de Lugo somos conscientes desa riqueza e impulsamos accións para potenciala, como son precisamente o programa de bolsas de emprego que hoxe presentamos ou o plan integral de desenvolvemento do sector agropecuario e forestal que demos a coñecer hai unha semana”, subliñou.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
