O Concello de Cervo transmítelle os seus parabéns a David Cal pola quinta medalla olímpica

O Concello de Cervo transmítelle os seus parabéns a David Cal pola quinta medalla olímpica

-O padexeiro cangués estivo vinculado a Cervo nos últimos tres anos, nos que pasou longas temporadas adestrando para os Xogos Olímpicos no encoro de Río Covo

Cervo, 8 de agosto de 2012-O Concello de Cervo quere manifestar publicamente a súa alegría, compartida por todos os galegos e españois, polo histórico papel do cangués David Cal nos Xogos Olímpicos de Londres. O padexeiro conseguiu unha medalla de prata que, sumada aos outros catro metais dos Xogos de Atenas e Pequín, convérteno no deportista español máis laureado nas Olimpíadas. O pentacampión competía na proba de C1 1.000 metros, para a que estivo adestrando nos últimos tres anos no encoro de Río Covo, onde pasou longas temporadas xunto ao seu preparador, Suso Morlán. “David Cal foi acollido en Cervo como un veciño máis, e os cervenses amosáronlle nestes anos todo o seu agarimo e lle transmitiron os seus mellores desexos de cara aos Xogos Olímpicos” explica o alcalde de Cervo, Alfonso Villares.

Ao mesmo tempo, o rexedor manifestouse moi agradecido co cangués: “Dende o primeiro día, David estivo moi preto da veciñanza e implicouse en multitude de actos organizados en Cervo. Compartiu o seu tempo con pequenos e maiores, participou en actividades relacionadas co piragüismo e co deporte e foi un estupendo embaixador de Cervo, destacando alá onde foi preguntado as moitas bondades do noso municipio e das nosas xentes”.

Villares amosouse “moi feliz” pola medalla de prata de David Cal e dixo “non ter dubidado que a súa participación nos Xogos Olímpicos de Londres faría historia. Só había que velo adestrando, a súa tenacidade, a súa forza de vontade, a súa enerxía e o seu optimismo que, unidos ás súas capacidades sobrehumanas, facían presaxiar que levaría para casa a quinta medalla olímpica”. O mandatario cervense asegura que “para o Concello, para a veciñanza e por suposto para min como alcalde, é unha honra ter contado no noso municipio cunha figura como David Cal, exemplo de como con esforzo e constancia se pode chegar ao máis alto, incluso en cinco ocasións”.