O porto de Foz acolleu a presentación da 50ª Travesía da Ría e a 4ª Travesía K-4 C-4

PRESENTADA A 50ª TRAVESÍA RÍA DE FOZ E A 4ª TRAVESÍA K-4 C-4

Antonio Veiga explicou que “esta regata é unha das citas deportivas máis importantes do calendario mariñao, converténdose nun claro elemento de atracción turística para a localidade”

A Ría de Foz acollerá estas dúas probas o sábado 25 e o domingo 26 de agosto

Foz, 22 de agosto de 2012. O porto de Foz acolleu, na tarde de hoxe, a presentación da 50ª Travesía “Ría de Foz” e da 4ª Travesía K-4 C-4, que organiza o Club Kayak de Foz e a Federación Galega de Piragüismo, esta fin de semana. No acto de presentación tomaron parte o vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga; o presidente do club organizador, Nacho Romillo, o alcalde da localidade, Javier Jorge Castiñeira e a concelleira de Deportes, Mercedes González.

Na súa intervención, o vicepresidente da Deputación explicou que “Estamos ante a segunda travesía máis antiga de Galiza, e a terceira máis antiga do Estado, tralo descenso do Sella e o descenso do Miño e, polo tanto, é unha das citas máis importantes do calendario mariñao”.

“Tanto é así – continuou Veiga- que esta travesía vai máis alá dun mero evento deportivo e convértese nun elemento de atracción turística para o concello, pois, como en edicións anteriores, serán moitas as persoas que se acheguen á vila esta fin de semana para presenciar a regata”.

O sábado, día 25, a partires das 10:30 horas, disputarase a 50ª Travesía “Ría de Foz”, para a que hai un total de 32 clubs inscritos, con 324 embarcacións e 397 deportistas, entre os que se atopa o medallista olímpico David Cal, inscrito na categoría C-1 Sénior. Nesta regata establécense as seguintes categorías: K-1 cadete, xuvenil e sénior, feminina e masculina; K-2 cadete, xuvenil e sénior masculina; e C-1 nas tres categorías de idade tanto para homes como para mulleres.

O domingo, día 26, a partires das 11:00 horas, disputarase a 4ª Travesía K-4 C-4, para a que hai un total de 16 clubs inscritos, con 49 embarcacións e 196 deportistas. Neste caso tamén se establecen as categorías cadete, xuvenil e sénior, tanto masculina como feminina. Haberá premios para os tres primeiros clasificados de cada categoría e para os tres primeiros clubs, que se entregarán ao finalizar cada unha das regatas.