Iniciadas as obras de colocación dun novo canalón no pavillón do CEIP Cervo nas que o Concello inviste 3.000 euros

Cervo, 26 de marzo de 2013-A Concellería de Educación informou hoxe do comezo das obras de substitución do antigo canalón de recollida de augas pluviais situado no pavillón polideportivo do CEIP Cervo. Uns traballos aos que o Concello destina uns 3.000 euros a través de fondos integramente municipais. En concreto, estanse instalando un total de 50 metros de canalón de aceiro galvanizado.

Esta obra fora solicitada pola Asociación de Nais e Pais do centro e para o Concello é “moi importante xa que estamos falando dunha infraestrutura como é o pavillón, na que os nenos e nenas xogan e desenvolven numerosas actividades” tal e como explica a edil de Educación e Obras, Pilar Armada. Neste caso, facíase necesario cambiar o antigo canalón, xa deteriorado, e colocar un novo para evitar goteiras.

O alcalde de Cervo, Alfonso Villares, as edís Pilar Armada e Yolanda Pedreira e membros da ANPA achegáronse hoxe ata o centro para comprobar o desenvolvemento das obras, que previsiblemente finalizarán mañá e, en todo caso, antes do remate das vacacións escolares de Semana Santa.

Armada destacou que esta obra está enmarcada nun proxecto máis amplo de conservación das instalacións educativas “co que pretendemos axudar e colaborar cos centros para seguir mellorando e mantendo o benestar do alumnado nos centros escolares”.