A Xunta colabora co X Encontro de Palilleiras de Cervo, coincidindo coa celebración dos Días Europeos da Artesanía

Cervo, 6 de abril de 2013.- Cervo acolle dende esta mañá o X Encontro de Palilleiras de Cervo que se celebra no Pavillón Municipal da Veiga e no que están citados máis de 600 artesáns do encaixe para amosar aos visitantes os seus labores e o seu bo facer cos bolillos. A directora de Turismo de Galicia, Nava Castro, e mais a delegada da Xunta de Galicia en Lugo, Raquel Arias, asistiron aos actos de inauguración deste encontro que chega á súa décima edición. Entre as dez e media da mañá e a unha da tarde poderanse ver os traballos das palilleiras. No transcurso do encontro tamén se fará entrega aos mozos palilleiros e palilleiras de diplomas acreditativos da asistencia, haberá venda no lugar do encontro e tamén diversos sorteos e actuacións musicais.

A directora de Turismo, Nava Castro, resaltou a importancia deste tipo de eventos para poñer en valor a artesanía galega e incidiu en que a artesanía de Galicia é unha singularidade do noso destino e enriquece a experiencia turística de quen nos visita.

Pola súa parte, a delegada da Xunta de Galicia en Lugo, Raquel Arias destacou na intervención inaugural que “o traballo maxistral destas palilleiras ten que ser entendido como unha oportunidade para favorecer a economía das familias artesás”. A delegada animou así ás palilleiras a aproveitar as distintas opcións para transformar esta actividade que, na maioría das ocasións se vive como unha afección, nunha oportunidade de negocio.

Neste sentido a delegada insistiu no apoio da Xunta de Galicia para favorecer que as artesás “tezan os seus encaixes con tres fíos: innovar para ser punteiros nos deseños, buscar novos mercados e mellorar as canles de comercialización dos productos”

Días Europeos da Artesanía
A Consellería de Economía e Industria participa na celebración dos Días Europeos da Artesanía con diferentes iniciativas de promoción e formación. Os días 5, 6 e 7 de abril celébrase a segunda edición dos Días Europeos da Artesanía, un evento promovido en España pola Fundación Española para la Innovación de la Artesanía (Fundesarte) e no que a Xunta de Galicia colabora por segundo ano consecutivo, baixo o que terán lugar toda unha serie de actividades relacionadas co sector artesán. Inspirada nas Journées des métiers d’art, desenvolvidas en Francia desde 2002, a convocatoria pretende obter unha participación cada vez máis ampla de países da Unión Europea. Coa incorporación de Portugal e Hungría, nove países tomarán parte este ano na celebración.

A participación nos Días Europeos da Artesanía enmárcase na estratexia de impulso ao sector artesán galego que desenvolve a Consellería de Economía e Industria a través da Fundación Centro Galego da Artesanía e do Deseño, un apoio que o xoves foi recoñecida nos Premios Nacionais de Artesanía, onde a Fundación resultou gañadora na categoría Promociona para Entidades Públicas.