O espazo de aprendizaxe e creatividade pedagóxica MAUmarela! organiza unha charla sobre o sentido educativo no deporte

Son mellores os deportes individuais ou en equipo?

O vindeiro xoves, 11 de abril, as 20:00 horas, preséntase no Espazo colaborativo da
Casa das Letras de Ribadeo “O SENTIDO EDUCATIVO DO DEPORTE”, unha charla coloquio destinada a nais, pais e adestradores infantís e xuvenís.

Falarán Juana Blanco, profesora de Psicoloxía da Escola Galega de Adestradores
de Fútbol e Manuel Valcárcel “Ventura”, entrenador do clube de atletismo Albións.

Está organizada polo Espazo de Aprendizaxe e Creatividade Pedagóxica MAUmarela!

Ribadeo, 5 de abril 2013.- Fomentar un senso educativo no deporte e dar resposta a algunhas das inquedanzas máis habituais arredor do deporte infantil son os obxectivos da charla coloquio O SENTIDO EDUCATIVO DO DEPORTE, organizada polo Espazo de Aprendizaxe e Creatividade Pedagóxica MAUmarela! o 11 de abril, ás 20.00 h, no Espazo Colaborativo da Casa das Letras, en Ribadeo.

Debo quitar ao meu fillo de fútbol se saca malas notas? Son mellores os deportes individuais ou en grupo? Pode un neno ou nena tímido sentirse parte dun equipo? É boa a presión no deporte? Que facer cos talentos deportivos? E cos nenos e nenas que non presentan boas aptitudes físicas? Juana Blanco, profesora de Psicoloxía na Escola Galega de Adestradores de Fútbol e Fútbol Sala, e Manuel Valcárcel Lastra “Ventura”, preparador do equipo de atletismo Albións, tentarán dar resposta a estas preguntas.

Os dous ponentes están de acordo en que o deporte é unha actividade fundamental na infancia, aporta valores como a obediencia, o respecto polos contrarios, a amizade, a aceptación do fracaso, a socialización. “Axúdache a organizarte, a inhibirte de outros vicios, promove unha vida sa…. “, sinala Ventura. Sen embargo, cómpre darlle ao deporte un “sentido educativo” para que isto sexa así, como apunta Juana Blanco. Pois o deporte é unha parte máis da vida, e hai que desfrutalo. “É importante traballar a autoestima e a motivación nos nenos, e buscarlles aquel deporte que se lles dea ben”. Porque a esixencia e a excesiva competitividade poden facer que os nenos abandonen.

MAUmarela! organiza esta charla coloquio como parte da súa aposta por explorar e difundir todo aquilo que poida contribuír á motivación dos nenos e adolescentes ante os estudos, e fomentar neles valores para a vida.