O GPP detecta que un concelleiro do BNG pese a cobrar da Deputación realiza as súas labores políticas no consistorio local de Ribadeo

Lugo, 19 de agosto de 2013.- O Grupo Provincial do PP vese obrigado a denunciar un novo caso de presunto pago con diñeiro público -da Deputación provincial- a membros nacionalistas que non realizan as funcións para as que foron contratados.

Os populares detectaron que un concelleiro do BNG de Ribadeo está a traballar a diario no Consistorio local –onde realiza as súas funcións políticas a prol do BNG- mentres percibe un salario da Deputación Provincial polo que debería prestar traballo de administrativo, como persoal eventual adscrito a unha área de goberno.

O Grupo Provincial do Partido Popular explica que é público e notorio que Vicente Castro Reigosa –edil nacionalista en Ribadeo- realiza as súas funcións políticas no consistorio local e que non se achega ao edificio da administración provincial, onde debería prestar asesoramento ao vicepresidente da Deputación, Antón Veiga, tal e como o recolle o seu decreto de nomeamento.

En concreto, o Boletín Oficial da Provincial –BOP- de data 22 de xullo de 2011, recolle o nomeamento con carácter de persoal eventual adscrito á Área de Benestar Social, Deporte, Igualdade e Mocidade, para prestar as súas funcións ao vicepresidente 1º, Antonio Veiga, a Vicente Castro Reigosa, como administrativo, con efectividade do 12 de xullo de 2011.

Sen lugar a erros
Neste caso, os populares explican que non hai erro que lle permita aos nacionalistas escudarse ante esta flagrante irregularidade, xa que neste caso o asesor nacionalista non está adscrito á area de Cultura e non presta funcións ao deputado Mario Outeiro, – tal e como acontecía nos outros casos denunciados polo Grupo Popular-, senón que o fai directamente ao vicepresidente primeiro da Deputación, e depende da área de Benestar.

Polo tanto, neste non existe a corrección de erros emitida por Besteiro logo das críticas dos populares,quedando patente que o edil nacionalista está adscrito a unha área de Goberno, mentres, é comprobable por todos os veciños, que realiza as súas funcións no concello de Ribadeo, se desprazarse ata o posto de traballo polo que recibe unha retribución anual superior aos 23.800 euros.

Dase, polo tanto e unha vez máis, o pago con diñeiro público da Deputación a unha persoa por un servizo que é evidente que non está a desenvolver, tal e como se recolle no seu nomeamento.

Posible financiamento ilegal dun partido político
Este feito convértese nun novo caso de presunto uso fraudulento de diñeiro público, que vén denunciando dende fai un mes o Grupo Provincial do PP dado a existencia dunha trama de traballadores liberados ao servizo do BNG, que percibían un salario como persoal adscrito a área de Cultura e Turismo da Deputación, mentres están a realizar funcións exclusivamente partidistas.

Trátase polo tanto, segundo advirten un populares, da utilización de recursos públicos ao servizo do BNG, polo que segundo os populares, se podería incluso estar a falar dun posible financiamento ilegal do partido.