O alcalde de Cervo define á Deputación como “o goberno do non”

Cervo, 12 de setembro de 2013-O alcalde de Cervo, Alfonso Villares, considera “unha burla” as declaracións do ex alcalde de Burela sobre a certificación das praias. “A Deputación é o goberno do non, leva anos negándonos todo canto lle solicitamos. Como para fiarse deles” cuestiona o rexedor.

Villares quixo poñer varios exemplos das constantes negativas da Deputación, que se veñen dando dende a entrada do actual equipo de goberno: “Adherímonos a un convenio para a mellorar da eficiencia enerxética que finalmente se negaron a acometer; entramos a formar parte do programa Innóvate para a implantación da administración electrónica e o máximo que conseguimos foi que viñeran sete persoas a traer cinco ordenadores aos que nunca lles deron uso”. O rexedor tamén lembra que “coa chegada do actual goberno, a Deputación cancelou os pagamentos da conexión a Internet nos telecentros rurais de Gondrás, San Román, Rúa, Trasbar e Castelo”.

E ademais, “pedimos ano tras ano que nos deixasen maquinaria para acondicionar as praias e as pistas, en moitos casos incluso a petición de asociacións do municipio, pero nin a resposta nin a maquinaria chegaron nunca”, engade Villares, que tamén expón máis casos. “Solicitamos en múltiples ocasións a roza e limpeza das estradas provinciais e só recibimos ou ben unha negativa ou ben a calada por resposta”. “Sen esquecernos de casos tan graves como o seu contundente non á ampliación do Museo do Mar” engade, ou “a súa negativa a acometer os accesos ao polígono industrial de Cuíña”. “O único que nos aportaron é unha multa de 20.000 euros sen sentido” manifesta.

Villares asegura que “esa é a política da Deputación co Concello de Cervo: Un non tras outro”. O mandatario cervense lembra que “cada vez que nos adherimos aos seus convenios perdemos tempo e cartos. Estamos cansos de abrir expedientes, mover papeis e mobilizar persoal para que todo caia sempre en saco roto”.

“Só hai que lembrar como o ex alcalde de Burela e a veciña de San Cibrao con responsabilidades na Deputación foron cómplices da cancelación do saneamento de San Cibrao”, engade Villares. “Eles dous, xunto co ex conselleiro de Medio Ambiente, Pachi Vázquez, visitaron o Concello de Cervo para dicirnos que fulminaban un proxecto de máis de 6 millóns de euros que fora adxudicado pola Xunta do PP e que o bipartito se encargou de botar abaixo” explica. “Eles foron os que quixeron pagar 200.000 euros para anular o contrato para o saneamento de San Cibrao”.