Cervo reduce a súa débeda amortizando de forma anticipada 330.000 euros

Cervo, 13 de novembro de 2013- A corporación de Cervo celebrará este xoves (11:00 horas) un pleno extraordinario no que se debaterán temas económicos de vital importancia para o municipio, como é o caso dos orzamentos para 2014 dos que o Concello xa ten informado. Pero ademais, a corporación abordará a amortización anticipada de débeda por importe de 330.000 euros que pretende facer o goberno local.

Unha operación que consiste en cancelar unha parte da débeda que ten o Concello cos bancos antes de tempo para así cumprir coa normativa actual. Cabe destacar que con esta amortización anticipada o Concello dá un paso máis en materia financeira. “Esta operación é posible pola solvencia e a boa saúde das arcas municipais” explica a edil de Facenda, Yolanda Pedreira.

Unha situación económica positiva que, tal e como lembra a edil, “xa nos ten permitido, por exemplo, pagar aos nosos provedores nos prazos que marca a lei, ou non subir os impostos nin este ano nin o que vén nin tampouco actualizar as taxas e ordenanzas segundo o IPC”.

Neste sentido, Pedreira tamén destacou que a débeda do Concello cos bancos reduciuse moi notablemente nos últimos anos. En concreto, se no 1999 a débeda era do 151%, no ano 2014 prevese que se sitúe no 51%, unha baixada moi destacable “que está directamente relacionada cunha xestión económica responsable que vimos mantendo nos últimos anos de forma constante” engade Pedreira. Ademais, nestes anos o Concello conseguiu eliminar por completo a débeda aos provedores, pasando dos 2 millóns de euros que había no 1999 aos cero euros da actualidade.

Polo tanto, esta amortización de débeda “é unha boa noticia para o Concello porque contribúe á estabilidade orzamentaria e nos permite seguir mellorando e traballando por Cervo” remata a responsable de Facenda.