Mario Pillado tomou posesión como concelleiro do BNG no pleno extraordinario celebrado este venres en Burela no que o BNG votou en contra da suba do canon de SOGAMA

Mario Pillado Mon tomou posesión como concelleiro do BNG, en substitución de Neves Cando, no pleno municipal extraordinario celebrado hoxe en Burela. Pillado, agradeceu na súa primeira intervención o traballo realizado por Cando ao longo dos últimos 14 anos e mostrou o seu compromiso para defender os intereses da maioría dos veciños e veciñas de Burela. Mario afirmou que “máis que nunca, no actual contexto de crise sistémica que está a afogar ás maiorías socias do noso País, se fai precisa a presenza dunha forza política como a que o BNG representa, que defenda os intereses das maiorías e os nosos sectores produtivos”.

O portavoz municipal do BNG tamén mostrou a súa sorpresa pola declaración de urxencia do pleno celebrado hoxe para aprobar a suba do canon de SOGAMA. En palabras de Pillado “resulta sorprendente que se teña tanta présa por aprobar unha suba que repercutirá no recibo que pagan todos os veciños e veciñas, que terán que asumir este incremento tarifario a partir do 1 de xaneiro de 2014”. Por outra banda, lamentou a “actitude demagóxica do alcalde nesta cuestión, que aplica esta medida sen demandar á Xunta a retirada deste aumento nos orzamentos do próximo ano e que repercutirá directamente nos veciños e veciñas de Burela”.

O BNG votou en contra da suba do canon de SOGAMA e exixiu a retirada do incremento do canon de Sogama que o goberno do PP na Xunta quere aplicar en 2014 e que suporía un incremento de preto do 34% aos concellos, pasando de 56 a 75 euros por tonelada tratada de lixo, sen contar o IVE. O goberno do PP na Xunta quere cargarlle á cidadanía novamente o recorte que o Goberno central do PP decidiu sobre as tarifas para percibir pola coxeración eléctrica. Desta maneira, ante a caída de ingresos que sufrirá Sogama pola xeración de enerxía, óptase por este incremento para cargarlle as perdas á cidadanía. Así fan posíbel que Sogama teña no 2014 uns beneficios de 7 millóns de euros’.

O portavoz municipal do BNG, Mario Pillado, remarcou que “este feito vén confirmar as denuncias do BNG sobre o fracaso do proxecto Sogama e o Plano de Residuos implantado polo PP na Xunta de Galiza, que defende a incineración, sen ter en conta a redución, a reutilización directa e a reciclaxe de residuos, a compostaxe, e a proximidade no tratamento, máis sustentábel ambientalmente e de menores custos. Ademais, no complexo de Sogama nin sequera unha porcentaxe significativa dos residuos se valorizan ou se reciclan, senón que simplemente se enterran”.

Engadiu que ‘os sucesivos gobernos do PP na Xunta tiveron empeño en impedir a existencia de plans alternativos como o iniciado no Morrazo e na Barbanza, modelos que priorizan a reciclaxe e compostaxe e mostran custos máis sensatos, para alén de crear máis emprego directo. De feito, a transformación de modelo de xestión dos RSU da Xunta de Galiza podería supoñer uns 2.000 novos postos de traballo con base en proxectos de comarcalización, cun menor custo ambiental e redución do custo de transporte’.

Finalmente, Pillado dixo que ‘hai que revisar o Plan de RSU Galiza 2010-2020, eliminando a previsión de construír un nova incineradora e apoiando un modelo que supere Sogama, mediante proxectos comarcais de reciclaxe e compostaxe, que posibilite a creación de emprego e alcanzar os obxectivos e recollida selectiva e reciclaxe dos modelos en funcionamento máis avanzados’.