O BNG de Viveiro convoca ás veciñas e veciños a unha concentración baixo o lema “Por un Viveiro aberto ao mar”

Viveiro, 8 de novembro de 2013. O Bloque Nacionalista Galego de Viveiro, convoca ás veciñas e veciños de Viveiro, a unha concentración baixo o lema “Por un Viveiro aberto ao mar”, que terá lugar o vindeiro día 23 de novembro de 2013 ás 12.30 horas.

O Portavoz Municipal do BNG Bernardo Fraga declarou esta tarde “ O BNG convidamos á cidadanía a concentrarse na defensa dunha das zonas máis importantes do noso Concello, como é o Muelle Vello, que se atopa nun estado lamentable e en constante deterioro, no que non pode continuar, e o Porto Deportivo, cunha nefasta xestión por parte de Portos de Galiza”

O BNG de Viveiro, realiza 6 demandas na concentración do día 23, como son; Demolición dos galpóns, reparación e mellora do Muelle Vello, retirada das casetas de obra do Porto Deportivo e devolución do edificio da Garda Civil do Mar, Eliminación do valado exterior do Porto Deportivo, cumprimento da lei de Símbolos e da Lei de normalización lingüística no porto, dragado dos accesos ao porto deportivo e normalización das relacións do Concello de Viveiro e Portos de Galiza.

Ademais, Fraga declarou “En dez anos de goberno de responsabilidade socialista, nada se ten avanzado na mellora do Muelle Vello, foron moitas as promesas, pero ningunha solución” “O entorpecemento mutuo entre o Concello, Portos de Galiza e o Departamento de Costas, provoca o abandono no que se atopa o peirao vello de Viveiro”

Así mesmo, o BNG, presentará nos vindeiros días, a través do Grupo Parlamentario, unha emenda aos orzamentos da Xunta de Galiza, para a inclusión dunha partida para a recuperación das concesións, demolicións dos galpóns e proxecto de mellora integral do Muelle Vello de Viveiro.