O Concello de Burela acometerá reformas no parque Rosalía de Castro

Burela, a 15 de novembro de 2013. O Concello de Burela acometerá reformas no parque Rosalía de Castro cun investimento total de 37.277 euros, dos que a Xunta de Galicia aportará a través dunha subvención un total de 29.822 euros. O Concello burelés só aportará 7.455 euros.

O alcalde burelés, José María González Barcia, e o concelleiro de Obras, Manuel Fernández Valle, supervisaron esta mañá as zonas do parque nas que se actuará. En concreto, segundo sinalou o concelleiro de Obras, Manuel Fernández Valle, “vanse substituír os xogos da zona destinada ós medianos, e vaise gañar como superficie de xogos un pasillo duns corenta metros cadrados que agora mesmo serve para separar a zona de pequenos da zona de medianos, aínda que ambas continuarán tendo as súas características específicas e as súas propias delimitacións”.

Fernández Valle afirmou que “con esta actuación, o parque Rosalía de Castro vai mellorar substancialmente, e así cumprimos por un lado co noso compromiso de mellorar as instalacións do parque e por outro coa petición que a asociación de veciños O Vencello lle plantexou ó alcalde sobre este asunto”.
O edil de Obras e primeiro tenente de alcalde manifestou que “as previsións pasan por ter esta actuación feita antes das festas de Nadal, en todo caso antes de final de ano. Os elementos que se retiren serán arranxados e boa parte deles colocaranse no parque infantil de O Cantiño, xa que entendemos que alí, con menos uso, poden dar un bo servicio e manterse máis no tempo”.

Manuel Fernández Valle recoñeceu “a importancia da colaboración da Xunta de Galicia para levar a cabo esta actuación. Unha achega do oitenta por cento facilítanos as cousas; de non ser así, teríamos difícil levar a cabo esta remodelación do Parque Rosalía de Castro”.