Nace un novo colectivo na comarca: AMAM, a Asociación de Magos Afeccionados da Mariña

AMAM (Asociación de Magos Afeccionados da Mariña) nace para impulsar a maxia na comarca, xa que é de ámbito comarcal, e para manter, ofrecer, apoiar a todas e todos aqueles que desfrutan desta arte, tanto a nivel profesional como por simple pracer.

O colectivo presentouse este xoves 2 de xaneiro dende O Traste, Burela. “Xuntámonos no comezo 12 persoas que contactamos grazas á maxia e que vimos que era necesario ofrecer un amparo para aquelas e aqueles que desexen aprender e practicar a maxia. Sen importar a idade, xa que dende os 17 ata os 61 anos forman parte xa da asociación, e non importa o sexo, aínda que é verdade que só somos homes por agora, unha mágoa, pero agardamos que as mulleres tamén cheguen á asociación”, explica o presidente de AMAM, Mago Senín.

A súa primeira presentación pública será o venres 10 de xaneiro en Burela tamén no Traste con entrada gratuíta onde se poderá ver as distintas variantes da maxia e coñecer a nova asociación a partir das 23.30 horas. Tamén, e antes dese acto, pretendemos achegarnos ao Hospital da Costa para que nestas datas, as persoas que teñen que estar alí, podan disfrutar da maxia e olvidarse por un anaco dos seus males.

AMAM está presidida polo Mago Senín, tamén están na directiva o Mago Pi e José Paredes, ademais de estar o Mago Miguel ou o Mago Jorge entre outros. “Incidimos no desexo de que a muller faga presenza e sexa parte deste navío que parte cara un mundo máxico”, explican.

Esta nova asociación, que comeza neste novo 2014, quere ser acollida para magos e magas e afeccionados e afeccionadas, e tamén unha bola máxica que reparta ilusión por toda A Mariña achegando as nosas artes a todos os concellos da comarca e en galego. Tamén poder chegar a facer unha semana da maxia na Mariña con magos de renome para que os e as mariñás vivan a maxia durante todo o ano.