O PSOE de Cervo advirte que “a celebración de 40 xuntas de goberno no 2013 ten como único fin dotar a certos edís dun salario encuberto”

CERVO, 11 DE XANEIRO. Os socialistas de Cervo aseguran que o número total de Xuntas de Goberno Local celebradas durante o pasado 2013 poñen de manifesto que “o seu único fin é dotar dun salario encuberto ós concelleiros que asisten a elas. A última acta que recibimos é a número 40, de maneira ordinaria teríanse que ter celebrado máis ou menos a metade”.

Os membros do Grupo Municipal Socialista lembran que no pleno de organización celebrado o 30 de Xuño de 2011, “tratamos un punto da orde do día referido a dación de conta da resolución da alcaldía 435/2011, no que aprobamos que se celebraría unha Xunta de Goberno cada quince días, dúas ó mes ou o que é o mesmo 24 ó longo do ano. É moi curioso que todos estes anos teñan que celebrar ó redor de 16 Xuntas extraordinarias”.

Apuntan que “cada asistente ás Xuntas recibe por cada unha delas 150 euros, a 40 anuais suman un total de 6.000 euros que veñen a equiparar ás adicacións parciais. Ou a previsión de traballo non é a máis adecuada ou efectivamente están a pagar un salario encuberto a aqueles edís que non teñen dedicación exclusiva nin parcial”.

Non é a primeira vez que os socialistas denuncian este asunto, no pasado mes de outubro auguraban que se chegarían ás 40 Xuntas de goberno, “non nos equivocamos porque coñecemos moi ben este goberno do PP”, seguen a calificar a actitude como un completo engano ós veciños e “esperamos que fagan balance do ano e xustifiquen esta maneira de traballar porque nós non a entendemos doutra forma”.