Burela, 12 de febreiro de 2014. O alcalde, José Mª González Barcia, decidiu de forma voluntaria aplicar unha baixada no seu soldo de 100 euros netos ao mes. A medida ten efectos desde o pasado 1 de xaneiro e supón a adaptación á lei de reforma das administracións locais, aínda que non tiña a obriga de facelo. O seu salario bruto será de 45.000 euros anuais. Barcia subliñou que a día de hoxe segue a ter o mesmo patrimonio que cando chegou por primeira vez á alcaldía de Burela no ano 2005.
O rexedor explicou que decidiu baixar o salario que percibe con efectos desde o pasado 1 de xaneiro: “o descenso neto é de 100 euros ao mes para axustarme ao que marca a lei de reforma das administracións públicas”. E subliñou que “o fago de forma completamente voluntaria. A lei de reforma das administracións públicas di que a modificación salarial se aplicará en xuño de 2015, ou en todo caso a aqueles concellos aos que Facenda a mediados deste ano lles indique que baixen os soldos. Fágoo de forma voluntaria, non tiña porque facelo ata que Facenda nos dixera algo ao respecto, e axústome ao que marca a devandita lei”.
José Mª González Barcia considera que “isto é un exercicio de responsabilidade e axústase ao que os cidadáns hoxe solicitan dos responsables públicos. Eu non estou mediatizado por nada, nin ninguén me pediu nada. Fágoo exactamente igual que cando no ano 2005, na miña etapa anterior coma alcalde, tomei posesión e decidín facer unha declaración pública do meu patrimonio, que por certo segue a ser o mesmo”. O alcalde de Burela indicou que “teño un piso comprado en 1988, un apartamento adquirido en 1999 e un piso procedente dunha herdanza familia. Teño o mesmo coche que comprei no ano 2002 e tamén unha conta bancaria. O meu patrimonio é o mesmo que tiña no 2005, non variou en absoluto”.
O salario do rexedor burelés será de 45.000 euros brutos ao ano, de acordo co que marca a lei de reforma das administracións públicas. González Barcia cre que “isto é o que está a pedir a xente, piden que os responsables públicos fagamos un exercicio de transparencia e eu así o fago. Digo o que gaño e digo o que teño” e insistiu en que “é un tema voluntario, porque eu agora mesmo non estaba obrigado a nada nin por lei nin polo que poida dicir a oposición. Nese sentido eu débome aos cidadáns, e como eles me elixiron no seu momento para ser alcalde por iso os informo da miña situación persoal”.
O alcalde engadiu que “este asunto se realizou por decreto da Alcaldía e tal e como marca a lei será levado a pleno”.
Baixo o título Memoria de mariñáns. Unha crónica da emigración da Mariña, o xornalista e investigador Martín Fernández Vizoso ofrecerá unha intervención centrada nas historias e vivencias dos emigrantes da comarca, ilustrando o fenómeno migratorio que marcou a vida de moitas familias ao longo do século XX. O evento inclúe tamén unha imaxe histórica de mariñáns retornados de América nos anos 30, que serve de fío visual para contextualizar esta realidade.
O prólogo é da profesora de Debuxo Camino Casabella Pumares, artista con raíces no Alfoz do Castrodouro, que participará na presentación xunto ao presidente do colectivo. Cinco dos pintores estarán presentes no acto, xa que Alaxe faleceu hai tres anos. A portada do caderno é obra do ilustrador Xosé Blanco. O evento celebrarase o sábado 8 de agosto ás 20:00 horas no castelo do Castrodouro, en Alfoz do Castrodouro.
En total foron ofertadas preto de 80 prazas de surf, piragüismo e vela, destinadas a nenas e nenos con idades comprendidas entre os 9 e os 15 anos. As escolas desenvolvéronse en diferentes quendas nos meses de xuño e xullo. O concelleiro de Deportes, Francisco José Silvent, subliñou “a importante participación da rapazada ribadense nas escolas deportivas de verán, que organizamos desde o Concello de Ribadeo coa axuda dos clubs que as impartiron. Queremos agradecer ás familias a confianza depositada nas nosas actividades, que lles serviron aos asistentes para practicar deporte na auga e para pasar uns días aprendendo e perfeccionando técnicas”.
No encontro mantido na sede da delegación territorial da Xunta en Lugo, no que tamén estivo o director territorial da Consellería, Marco Antonio Fernández Piñeiro. abordáronse liñas de cooperación para a mellora de Infraestruturas e de seguridade viaria, de interese para este municipio. O departamento que dirixe M. Allegue segue prestando apoio aos municipios para executar actuacións que contribúan a mellorar a calidade de vida da veciñanza e a reforzar a competitividade económica.
Xa se poden ver auténticas "artistadas", todas coas serea como protagonista, enchendo o ambiente desa creatividade tan propia da celebración.
O corte estará vixente entre as 00:00 e as 05:00 horas da madrugada do venres 7 ao sábado 8 de agosto, co obxectivo de garantir a seguridade das persoas asistentes e o correcto desenvolvemento do evento, que terá lugar nos Xardíns Noriega Varela. Desde o Concello de Viveiro solicítase a colaboración da veciñanza e das persoas condutoras, recomendando planificar os desprazamentos con antelación e utilizar itinerarios alternativos durante o tempo que permaneza vixente esta restrición.
No Campo de Fútbol de As Valgas poderanse ver desde as 21.30 horas as actuacións de Netos de Bandim, chegados desde Guinea Bissau; da Philippine Performing Arts Company, das Filipinas; e do grupo anfitrión O Arco da Vella. Un encontro único de culturas, ritmos e emocións que promete unha noite inesquecible.
