O Concello de Cervo esixe á Deputación que “actualice as contas que ten pendentes co Concello”

O Concello de Cervo ven de dirixir un escrito á Deputación Provincial para esixirlle que actualice as contas que ten pendentes co Concello.

Con esta carta “queremos contestar ás críticas da Deputación nas que volve falar dunha débeda do Concello co ente provincial que, en realidade, só ten que ver coa incompetencia do departamento de Recadación da Deputación”, segundo aseguran dende o Concello.

O texto, asinado polo alcalde, Alfonso Villares, di:

“Fai uns días, dende a Deputación Provincial de Lugo facían público o pago do 75% da anualidade de 2013 correspondente aos GES, aos concellos que cumprían os requisitos. Na dita publicación, din que ao Concello de Cervo se lle compensou a contía a percibir coa débeda que ten pendente coa Deputación, que corresponde ao recargo do IAE entre o 2009 e o 2012.

Lembramos que dende fai uns anos, este concello ten delegada na Deputación Provincial a cobranza do Imposto de vehículos de tracción mecánica, IBI e IAE (agás a parte de Alúmina) polo que esa Administración provincial ten a posibilidade de compensar a débeda pendente. Non entendemos pois que aínda non o teña feito, salvo que sexa por deixamento de funcións, por algunha irregularidade ou por incompetencia por parte de ese ente provincial.

Polo que, desde o Concello, solicitamos:
1.- saber cal é o motivo polo que non cancelaron a débeda que este Concello poida ter con vostedes

2.- que, coa maior urxencia posible, tomen as medidas que proceda para cancelar a dita débeda

3.- Sorpréndenos que esa incompetencia na xestión dos recursos da Deputación Provincial tan só sexa co Concello de Cervo e non cos outros catro concellos gobernados polo partido socialista, aos cales lles aboaron o pago polos GES, polo que nos gustaría saber se eses catro concellos (Becerreá, A Fonsagrada, Monterroso e A Pontenova) tiñan algún tipo de débeda coa entidade provincial á data da publicación”.