“Por ceibar a voz” con Miro Casabella no Pastor Díaz

Desde hai uns meses as asociacións culturais da comarca veñen desenvolvendo actividades para homenaxear ao músico Miro Casabella. O pasado 25 de abril foi a vila de Ribadeo a que acolleu o primeiro dos concertos “Por ceibar a voz”. Agora o colectivo Pensamento e sementeira organiza en Viveiro, no Teatro Pastor Díaz, o segundo dos concertos de homenaxe ao músico do Valadouro. Será o vindeiro 7 de xuño, ás oito e media da tarde en el intervirán, ademais do músico homenaeado, Miro Casabella o cantautor guardés Tino Baz, a Coral Polifónica de Viveiro, David Bellas e músicos do Conservatorio Profesional de Música de Viveiro. O colectivo viveirés que convocou, a finais do ano pasado a colectivos culturais da comarca, fai parte da comision organizadora que está a programar o acto central destas homenaxes que terá lugar no verán, na vila natal de Miro Casabella, o primeiro sábado do mes de xullo.