A Federación de Comercio da Mariña asina convenios para ofrecer acceso a varias actividades ós seus asociados

A Federación de Comercio da Mariña acaba de asinar dous convenios de colaboración con distintas entidades, en aras de dar facilidades aos seus asociados ó acceso a determinadas actividades.

Os convenios asinados son, por unha banda a adecuación á Lei Orgánica de protección de datos de carácter persoal, e por outro Google Business Photos que consiste na realización dun Tour virtual polos negocios e darse a coñecer así a un maior número de clientes. En ambos convenios os asociados poderán beneficiarse de descontos e bonificacións que farán máis accesibles calquera das dúas accións.

Nos próximos meses seguiranse pechando máis convenios de colaboración con distintas empresas de distintos ámbitos, sempre relacionados con temas que poidan ser de interese para os asociados. Estes convenios están tendo moi boa acolleita entre as asociacións pertencentes á Federación, posto que as condicións son negociadas a nivel comarcal o que fai que as vantaxes e beneficios sexan mellores.

Durante os meses de xuño e xullo seguirá en marcha a campaña publicitaria que se está levando a cabo nos distintos medios da comarca, en defensa do comercio local e o consumo nas distintas localidades que forman A Mariña.