O BNG pide transparencia absoluta ao Goberno do PP na concesión de subvencións aos colectivos de Burela

O BNG de Burela, como xa fixo no seu día, quer expresar unha vez máis a súa total disconformidade e frontal desacordo co inxusto sistema polo que o Goberno Municipal do PP concede subvencións aoscolectivos e asociacións da vila.

O Goberno do PP, co Sr. Barcia á cabeza, está a utilizar o diñeiro de todos os veciños e veciñas de Burela de xeito claramente clientelar e discriminatorio, sen uns criterios e unhas bases públicas que garantan os principios de equidade e transparencia. Independentemente de que se podan subvencionar puntualmente algunhas actividades ou facer convenios de colaboración con determinadas entidades, ese non deber ser o xeito habitual de proceder á hora de conceder subvencións públicas ao conxunto do tecido asociativo.

Os propios colectivos non coñecen os motivos polos que se lles conceden ou denegan axudas públicas, sen que exista a posibilidade de que podan presentar unha solicitude pola que sexan baremados obxectivamente e onde se valorencuantitativa e cualitativamente as actividades que realizan ao longo do ano.En palabras de Mario Pillado, portavoz municipal do BNG, “queda claro que o PP non goberna para todos os veciños e veciñas de Burela e que o único que procura é a confrontación directa con determinados colectivos”. Pillado engadiu que “existen numerosas asociacións da nosa vila que desenvolven unha importante actividade durante todo o ano e que a día de hoxe aínda non coñecen os motivos polos que foron excluídas das subvencións a colectivos o pasado ano. Desde o Goberno está a aplicarse unha política clientelar onde o diñeiro público se xestiona en función do interese particular e non do interese xeral.”

O Sr. Barcia discrimina de xeito descarado á Banda de Música de Burela, deixándoa sen ningún tipo de subvencióntamén este ano.

O feito de que non haxa unha convocatoria pública de subvencións á que podan concorrer todas as asociacións que o desexen, provoca que algunhas asociacións queden sen ningún tipo de axuda por vontade do propio Goberno Municipal, como é o caso da Banda de Burela. O Concello, que en 2011 denunciara por motivos económicos o Convenio de Colaboración que existía coa Asociación de Amigas e Amigos da Banda de Burela, deixa agora a esta asociación fóra das axudas concedidas en 2014, sendo das poucas (se non a única) que non vai recibir un só céntimo por parte da Administración Local.
O Concello decidiu prescindir do director da banda desde o pasado mes de marzo e agora deixa á agrupación sen ningunha axuda económica. O Sr. Alcalde debe aclarar que futuro quere para a Banda de Burela ou se pretende que desapareza directamente.