Os socialistas instan ós gobernos do PP a manter os partidos xudiciais e alertan da necesidade de comedores infantís durante as vacacións escolares

CERVO, 10 DE XUÑO. Os socialistas de Cervo veñen de presentar no Concello dúas mocións co obxectivo de “defender o dereito á xustiza de tódolos cidadáns e poñer en marcha un Plan de Apoio á Alimentación Infantil que garanta as necesidades básicas de alimentación daquelas familias que están pasando por momentos económicos difíciles”.

O Anteproxecto de Lei Orgánica do Poder Xudicial presentado polo Goberno de Rajoy suporá “a eliminación de oito dos nove partidos xudiciais cos que conta a Provincia de Lugo. Esta medida centralizadora privará ó 60% dos lucenses dunha xustiza accesible, obrigándoos a desprazarse máis dunha hora da súa residencia, co consecuente incremento do gasto. No caso do Concello de Cervo, pasamos de estar a 16 quilómetros do Xulgado de Viveiro a estar a máis de 100 quilómetros, en caso de viaxar ata Lugo”.

O desprezo do Partido Popular cos lucenses que non residen na capital foi unha constante dende a súa chegada ó Goberno, “o PP fai así distincións entre cidadáns de primeira e de segunda coa máxima arbitrariedade posible, diferenciándoos tan só polo seu lugar de residencia”.

Pedimos que dende o Concello de Cervo, “manifestemos un absoluto rexeitamento ó devandito Anteproxecto de Lei Orgánica do Poder Xudicial, esixindo de maneira inmediata a súa retirada ó Goberno Central por ser unha reforma que atenta contra o acceso á tutela xudicial efectiva dos cidadáns e que o Presidende da Xunta de Galicia, Alberto Núñez Feijóo, defenda os dereitos dos galegos iniciando os trámites necesarios para garantir o mantemento do partido xudicial de Viveiro así como dos outros oito que temos na actualidade en toda a provincia”.

Alimentación para os nenos sen recursos
Dende o Grupo Municipal Socialista alertan con outra moción da difícil situación pola que están a pasar moitas familias do noso concello e sobre todo aquelas que teñen membros menores, “a longa crise económica que vimos padecendo, xunto cunha política descontrolada, por parte dos Gobernos do PP, de recortes sociais e desmantelamento dos servizos públicos básicos está a provocar o aumento dramático da pobreza no noso país. Aínda por riba, son moitas as estatísticas que apuntan cifras alarmantes sobre pobreza infantil”.

A falta de ingresos está a provocar que moitas familias teñan que acabar recortando en necesidades básicas como a comida, “os servizos de comedores escolares permitiron mitigar esta realidade para os máis pequenos durante o curso escolar, pero atopámonos ante un final de curso incerto no que esta necesidade pode quedar desatendida ó pechar os centros, e por tanto os servizos de comedor”.
Ante estes datos, os socialistas consideran que “este servizo directo de atención no comedor debería manterse en etapas de vacacións escolares, mediante un Plan Específico de Apoio á Alimentación Infantil”.

Instamos ó Goberno Municipal a “poñer en marcha, de maneira inmediata, este plan para garantir que as familias con menores ó seu cargo, que se atopen en situación de necesidade teñan cubertas as súas necesidades básicas de alimentación, facilitando o acceso dos menores, polo menos, a tres comidas diarias. Pedimos que dende a finalización do curso no vindeiro mes de xuño, os servizos de comedor continúen estando dispoñibles nos nosos colexios para evitar este tipo de casos”.

O Grupo Municipal Socialista engade que “esta reivindicación que a sumen ás que solicitamos ultimamente sobre a execución do gasto consignado para emerxencia social ou que non deixen pasar cinco meses para resolver as axudas da RISGA, a xente que realmente as necesita non pode agardar ese tempo, porque lle chegan tarde. Que se poñan a traballar polas persoas, polas persoas que necesitan máis ca nunca da súa axuda”.