Uxía Senlle ofrecerá un concerto este sábado no Eido Dourado con Sergio Tannus

Barreiros, 9 de xullo de 2014. Celso Dourado, responsable do espazo artístico barreirense Eido Dourado, foi o encargado de anunciar este concerto que terá lugar o próximo sábado día 12 de xullo, a partir das dez da noite, nos xardíns deste espazo dedicado ao arte. Nel actuará de forma altruísta a cantante galega Uxía Senlle, que estará acompañada polo guitarrista Sergio Tannus. Eles serán os encargados de poñer en marcha a nova tempada de concertos de verán no Eido Dourado, que se levarán a cabo as fins de semana dos meses de xullo e agosto.

Celso Dourado destacou como novidade que “esta vez o concerto vai celebrarse o sábado, e non o domingo como ven sendo habitual, xa que tivemos que adaptarnos a programación de Uxía”. O artista barreirense quixo subliñar a “importancia desta actividade, xa que Uxía é a voz deste país. É unha cantante e cantautora moi recoñecida, cunha traxectoria incualificable, que unha vez que visitou o Eido decidiu comprometerse de forma totalmente gratuíta e altruísta para abrir algunha das tempadas musicais do Eido Dourado”. Un compromiso que “este ano non puido cumprir por problemas de axenda que lle impediron estar na presentación da tempada a finais do pasado mes de xuño, pero que finalmente resolveu para poder estar o próximo sábado, 12 de xullo, no inicio dos concertos”. Un feito que para Celso Dourado “da mostra da súa talla moral e da súa calidade como persoa e como artista”.

Uxía Senlle estará acompañada polo guitarrista Sergio Tannus, “un músico brasileño ou brasilego como a el lle gusta que lle chamen”, recorda o responsable do Eido Dourado. Os dous presentarán un concerto “sentido”, en palabras da propia Uxía, que se levará a cabo á noitiña. “Eliximos este momento porque é cando precisamente o xardín do Eido combina mellor a luz natural, coa iluminación que ten”, afirma Celso Dourado.

O evento contará con entrada libre e gratuíta, se ven Celso Dourado aproveita a ocasión para aconsellar aos veciños que “quen queira asistir, canto antes se acerque mellor, xa que o xardín conta cun aforo limitado de 170 persoas sentadas, e como moito 200 en total”.