Pedreira: “A Deputación ten bloqueada a obra na estrada de Rúa porque cre que a fai o Concello de Cervo”

Cervo, 22 de agosto de 2014- A edil Yolanda Pedreira lamentou este venres a forma de proceder da Deputación, que “minte para ocultar os seus erros coa estrada de Rúa”, que leva dous meses cun grande burato aberto nun dos carrís xa que o Goberno Provincial non dá permiso ao Consorcio para continuar coas obras.

Pedreira asegura que “dicir que o Concello executa esas obras é unha gran mentira”, xa que é o Consorcio de Auga o que contrata e financia eses traballos. Pero ao mesmo tempo, grazas a esta situación, “descubrimos a actitude da Deputación, que en canto cre que as obras son do Concello decide obstaculizalas sen importarlle poñer en perigo aos veciños”. De feito, tamén “puidemos comprobar como o Goberno Provincial actúa sempre en contra dos intereses dos veciños de Cervo”. Por este motivo, o Concello xa anunciou que estudará as medidas a adoptar ante esta “nova irresponsabilidade” da Deputación.

A edil lembra que hai dous meses o Consorcio de Auga Cervo-Burela pediu permiso á Deputación para rematar as obras. “Temos constancia de que esa solicitude chegou ao Goberno Provincial, porque o Consorcio ten o acuse de recibo, pero aínda así, as obras seguen bloqueadas” engade Pedreira.

“Hai unha cousa clara: A Deputación tivo moito interese en crear un problema de inseguridade na estrada de Rúa, pero agora non ten ningún interese en solucionalo”, asegura Pedreira, que aproveita para lembrar que o Concello xa informou á Subdelegación do Goberno, á Garda Civil e á Dirección Xeral de Tráfico da situación de perigo que existe nesta zona e advertiu á Deputación de que todos os incidentes que se produzan a causa desta situación serán de responsabilidade provincial.