A oficina municipal de Rehabilitación do Casco Antigo de Viveiro tramita as axudas ao alugueiro de vivenda do Plan Estatal

María Loureiro García, Alcaldesa do Concello de Viveiro, informa que “con data 19 xaneiro de 2015 publicouse no Diario Oficial de Galicia a resolución pola que se convocan, na anualidade 2015 con financiamento plurianual, as subvención do programa de axuda ao alugamento de vivenda do Plan estatal de fomento do alugamento de vivendas, a rehabilitación edificatoria e a rexeneración e renovación urbanas 2013-2016”.

O prazo para solicitar estas axudas remata o vindeiro 19 de febreiro, e só serán estudadas as solicitudes presentadas antes desa data e que cumpran os seguintes requisitos establecidos pola resolución:

– Que a vivenda sexa o domicilio habitual e permanente do solicitante.
– Estar empadroado na vivenda arrendada.
– Que o límite de ingresos da unidade de convivencia, composta polas persoas que teñan ou vaian ter o seu domicilio habitual e permanente na vivenda arrendada, non superen 3 veces o IPREM.
– Que o solicitante non sexa titular dunha vivenda no territorio nacional.

Estas axudas van destinadas ás persoas máis desfavorecidas, e a colectivos como familias numerosas, mulleres vítimas de violencia de xénero, vítimas do terrorismo, persoas con discapacidade e persoas afectadas por desafiuzamentos.

As axudas poderán chegar a un 40% da renda anual, cun límite de 2.400 euros anuais por vivenda. As subvencións concederanse por un prazo de 12 meses, prorrogables por un ano ata a finalización do plan vivenda no ano 2016.

Para tramitar as axudas será necesario completar a solicitude anexa á resolución publicada no DOGA e xuntar a documentación requirida. A resolución será notificada antes de 3 meses e realizarase en réxime de concorrencia competitiva polo que se realizará unha baremación das solicitudes presentadas.

Todas as emendas de documentación, relación das persoas beneficiarias e importe das axudas concedidas serán publicadas na páxina web do Instituto Galego de Vivenda e Solo (IGVS) (www.igvs.xunta.es).

As persoas que desexen solicitar as axudas referidas ou realizar calquera consulta ao respecto poden achegarse á Oficina municipal de Rehabilitación do Casco Antigo de Viveiro (tel: 982 562 968), onde se proporcionará axuda e información ó respecto.