Suárez Barcia pide prudencia sobre o suposto pasado mineiro da Praia das Catedrais

Ribadeo, 16 de marzo de 2015. O alcalde de Ribadeo, Fernando Suárez, pide prudencia sobre o suposto pasado mineiro da praia das Catedrais ao que aludían hai uns días varias asociacións patrimoniais. Suárez Barcia dixo que si iso se confirma “faría dese monumento natural unha marabilla aínda máis importante a nivel internacional”.

O rexedor aludiu hoxe “ao posible pasado mineiro, de extracción dalgún tipo de mineral, no entorno das Catedrais, segundo indican varias asociacións de patrimonio natural, etc. Desde o Concello debemos dicir que non temos medios técnicos capaces de contrastar esa nova e non nos queda outra que pedir prudencia sobre este posible achado”.

Fernando Suárez indicou que “no caso de que iso se confirmara a este monumento natural marabilloso que temos en Ribadeo habería que sumarlle tamén a existencia dun pasado histórico, de hai moitos séculos, que faría del unha marabilla aínda máis importante a nivel internacional”.

O alcalde de Ribadeo pensa que “deberan ser outras administracións con competencia na materia, singularmente en arqueoloxía, ben a Deputación de Lugo ou a Xunta de Galicia, as que boten luz enriba destes achados para contrastar e por ver si isto realmente é así ou si simplemente non deixa de ser unha teoría máis”.