A asociación de veciños Burgo de Trasbar inicia as actividades do verán do seu cuarto aniversario

A Asociación de veciños Burgo de Trasbar vai xa cara os 4 anos. Por iso, a primeira das actividades previstas para este verán será a festa de aniversario que se celebrará o domingo 24 de maio a partir das 17.00 horas no local social. Durante o acto proxectaremos un vídeo resumo das actividades do último ano e tamén haberá pastel de aniversario.

Pago cotas
O vindeiro domingo inicia o prazo para o pagamento das cotas de socias/os e estará aberto ata o 14 xuño (ambos incluídos). As persoas que non actualicen a cota nese período serán dadas de baixa de xeito automático.
O pagamento pódese facer no Local social ou a través da conta que ten aberta a Asociación de Veciños do Burgo de Trasbar en ABANCA: IBAN ES34 2080 0160 4630 0005 1668. As cotas son as seguintes: 15 euros, adultos; 10 euros, xuvenil (15 a 18 anos) e 5 euros a infantil.

San Antonio
Ó igual que estes anos atrás, o 13 de xuño, realizaremos o camiño ao San Antonio da Rigueira. A xente que queira a cartilla de romeiro deberase apuntar antes do 7 de xuño (incluído). Sairemos do Local social de Trasbar ás 10.00 horas.

Este ano a Asociación non organiza o xantar por coincidir o mesmo día o aniversario do falecemento do que fora socio e veciño, Benigno, ás 18.00 horas.

San Xoán
Terá lugar o día 20 de xuño en Trasbar. Teremos a pancetada/chourizada e a fogueira. A programación está sen determinar.

Asemblea Xeral
Este ano toca renovar a Xunta Directiva. A Asemblea Xeral terá lugar o domingo 28 de xuño, ás 11.30 horas (recibirán convocatoria).
Adiantamos a información pensando nas persoas interesadas en presentar candidatura.

Peche local
O domingo 28 de xuño pola noite pechamos o Local social ata a primeira fin de semana do mes de outubro.

Pregamos que desculpen as molestias, pero precisamos centrarnos na organización das festas patronais da Santa Eufemia que terán lugar no mes de setembro.

Charla de seguridade
Impartida pola Garda Civil, logo de ser adiada en varias ocasións, confírmannos que a charla de seguridade terá lugar o mércores, 1 de xullo, pola tarde, no Local social de Trasbar. Non é precisa inscrición previa.

Sargadelos
Tal e como vimos facendo dende o comezo da actividade desta asociación, organizaremos o camiño ao Santiago, en Sargadelos. Será o 25 de xullo e recibirán máis información preto da data.

Outras actividades
O verán vainos dar para facer máis xuntanzas. Non faltará a bonitada nin algunha outra “farrada” para as que vos iremos informando máis polo miúdo.