A Confederación ANPAS Galegas reclama un sistema de prestamo universal e gratuíto dos libros de texto

A Confederación reuniuse no que ía ser a última xuntanza do curso 2014-2015 que se había dedicar a facer balance do curso que está a rematar, pero a recente publicación das ordes que regulan as axudas para a adquisición de libros de texto, así como o novo banco de libros que organizará a Xunta de Galicia co nome de “fondo solidario”, provocaron que a reunión se convertera nunha análise destas ordes, e na organización dunha resposta ás mesmas dende a perspectiva permanentemente reiterada da nosa organización de recuperar o sistema de préstamo universal e gratuíto dos libros de texto e material didáctico adaptado.

A nosa valoración da situación actual e fondamente negativa porque
• O modelo que se nos impón é un modelo parcial, non contempla á totalidade das familias galegas.
• É un modelo que non responde ás necesidades e requirimentos de todas as familias, a Xunta de Galicia presenta un procedemento que continúa a mesturar o normal desenvolvemento dun dereito que debera ser para todos e todas, coa atención social ás persoas en situación de necesidade.
• Baixo o falso paraugas da autonomía de xestión dos centros escolares, está acubillando unha fragmentación da atención ás familias que vai dar lugar a permanentes agravios comparativos.
• Desatende os dereitos das persoas con necesidades específicas de apoio educativo, ao referilas ás posibles valoracións que fagan os equipos directivos para poder exercer o seu dereito, no canto de llelo recoñecer fixando baremos obxectivos.
• Ao non clarificar a vixencia dos libros de texto, e permitir que cadanseu centro escolar poida cambiar os de 4 dos 8 cursos posibles, existirá un tratamento diferente en cada centro escolar galego, coas implicacións económicas discriminatorias que isto supón.
• Converte nunha decisión esnaquizada a actualización ou non dos libros de texto aos currículos da LOMCE, imposibilitando tanto adiar a súa implantación, tal e como demandamos, como levala a cabo.
• Sobrecarga ás direccións dos centros escolares dun traballo administrativo que non lles corresponde, e que os aparta un pouco máis da súa función docente.
• É un modelo que parte da imposición, non foi negociado, nin tan sequera presentado, coa comunicade educativa, malia as nosas reiteradas ofertas de diálogo.
• Afonda na consideración do libro de texto como ben de consumo, ao remitir a unha ampla parte das familias á necesidade de mercar ese material didáctico, desaproveitando o grandísimo valor educativo da reciclaxe e do aproveitamento para o grupo, da importancia de compartir e construír a comunidade.
• Oponse ao mandado constitucional do ensino público gratuíto, e pon outro peso económico importante nos ombreiros das familias galegas.