O BNG de Riotorto critica que o goberno do PP non esixirá aos madeiristas que arranxen os estragos nas pistas forestais

Riotorto, 7 de xullo de 2015.- O pasado venres celebrouse en Riotorto un pleno extraordinario de constitución do novo goberno municipal que o PP aproveitou para coar unha proposta que exime aos madeiristas do depósito dunha fianza que os comprometa a arranxar os desperfectos que causen nas pistas forestais.
O alcalde Riotorto Clemente Iglesias firmará un convenio coa Asociación Provincial de Empresarios da Primeira Transformación da Madeira que rebaixa as esixencias da ordenanza municipal vixente, que obriga aos madeiristas a depositar unha fianza no concello antes de comezar as cortas.

O BNG de Riotorto opúxose a esta proposta, que saiu adiante cos votos dos representantes do PP e mais da concelleira socialista. Os concelleiros nacionalistas criticaron no pleno a posición do novo goberno municipal que pon nas mans da Asociación, como intermediaria, a opción de reparar ou non as pistas, deixando desprotexidos aos veciños e veciñas.

“O alcalde presentouse no pleno cunha proposta co selo da asociación de madeiristas, redactada por eles, deixando ben claro que actúa ao seu dictado, antepoñendo os seus intereses aos dos veciños e veciñas de Riotorto. Dende o BNG, denunciamos a contradición na que cae o goberno do PP. Se non quere esixir a fianza aos madeiristas terá que traer ao pleno unha proposta para derogar ou cambiar a ordenanza municipal vixente. Non imos consentir que tome atallos para devolver favores electorais a costa dos intereses dos veciños”.

A citada ordenanza municipal aprobouse na última lexislatura co apoio de todos os grupos, incluído o PP. A normativa esixe aos madeiristas unha fianza que se devolve se non se producen problemas e os camiños quedan no mesmo estado no que se atopaban antes de sacar a madeira. A maioría dos concellos da Mariña adoptaron resolucións similares nos últimos anos como resposta a unha demanda veciñal moi xeneralizada.