Os socialistas denuncian a situación de “parálise absoluta” na que o Partido Popular mantén á Deputación de Lugo

O Grupo Provincial Socialista na Deputación de Lugo denuncia a situación de “parálise absoluta”, na que o Partido Popular mantén o organismo provincial dende a súa chegada. A Deputada socialista, Pilar García Porto, explicou este venres que “o único que fixo o PP durante este tempo foi cambiar as pechaduras das portas de algúns servizos provinciais, amosando unha absoluta desconfianza nos traballadores públicos. É un caso sen precedentes, posto que os socialistas nunca fixemos isto a pesares de chegar á institución luguesa logo de 25 anos do PP”.

“Pero o desprezo aos traballadores da Deputación por parte do Partido Popular vai máis alá, pois unha boa parte dos novos Deputados delegados de áreas provinciais nin se pasaron polos seus respectivos departamentos a presentarse ou coñecer o traballo que se leva a cabo. Isto é, ademais, unha evidente mostra do nulo traballo que o PP está a realizar no organismo provincial”.

“Outra mostra desta parálise e absoluta desidia do Partido Popular é que, a estas alturas, nin nomearon aos membros da Xunta de Goberno Provincial, tal e como fixemos os socialistas antes da celebración do Pleno de Organización”, salientou.

García Porto engadiu que “Elena Candia tivo máis interese en facer de Delegada da Xunta en Lugo, anunciando que vai a asumir custos que por lei lle corresponden ao Goberno galego de Feijóo, que en exercer de Presidenta da Deputación de Lugo, nunha clara manobra de competir con Raquel Arias e de intentar substituír a Barreiro no Partido Popular”.

Ante todo isto, a Deputada socialista concluíu, reclamando ao PP: “póñanse a traballar o tempo que lles queda na Deputación”.